CM-in Kolasib-ah ICAR hmun a hawng

Chief minister Lal Thanhawla chuan nimin khan Indian Council of Agricultural Research (ICAR) Complex for NEH Region Mizoram Centre, Kolasib-ah Scientist Home, type IV quarters, Seed Processing Unit leh Mushroom Spawn cum Production Unit a hawng a; 'Climate Change: Agriculture Adaptation and Mitigation Strategies in Mizoram' tih thupui hmanga seminar buatsaih a hawng nghal bawk.

Worshop hawnna hi Kolasib ICAR conference hall-ah neih a ni a; CM Lal Than­hawla chuan, ICAR chu India ram tana thil zir chiangtu pawimawh, ei leh bar kawnga thawh chhuah tipungtu leh kut hnathawktute tana thawktu an nih thu sawiin, ICAR chu Horticulture leh Agriculture department-te'n lo neitute fanpui se a duh thu a sawi.

Lal Thanhawla chuan, khawvel mihring pung zelah fimkhur vak loa hmalak tawhna avangin boruak a chhe mek zel a, sik leh sa nasa takin a lo danglam mek tih a sawi a, "Sik leh sa danglam nasa ta lutuk hi khawvelin a ngaimawh sâwt hle. India pawhin a ngai pawimawh a, Central leh state level-a Environment & Forest Ministry chu Climate Change tih dah belhin, Ministry of/ Department of Environment, Forest and Climate Change tiin a thlak a ni ta hial a ni," a ti.

Chief Minister chuan, khawvela mithiam­te hmaa chona awm mek chu ‘Environment tichhe si loin ei tur khamkhawp engtia thar tur nge', tih leh ‘Kan chhehvel boruak engtin nge kan tih thianghlim ang a, tuihna engtin nge kan siam ang, ramngaw engtin nge kan neih leh ang,’ tihte a nih thu a sawi a; ei leh bara intodelh, ramngaw humhalh, tuihna siam, boruak tihthianghlim leh a dangte chu NLUP-ah a tel vek niin a sawi.

Sik leh sa inthlak zel vanga Mizorama thlai chîn mekte zir chian ngai a awm nuala a rin thu sawiin CM Hawla chuan, mithiamte pawhin sik leh sa inthlak karah thlai tlo leh thlai thar hlâwk tur chite an ngaihtuah a ngai tih a sawi a, "Sik leh sa inthlak vanga thlai, buh leh bâl thar kawnga harsatna lo thleng theite zirchianna leh harsatna hlawhtling taka lo do let dante pawh research nen bihchian a ngai," tiin, chumi kawngah chuan nasa zawka inzirtirna kalpui turin ICAR hotute a chah.

Chief Minister chuan, kut hnathawktute chu ram innghahna an nih avangin Mizoram sorkarin a ngai pawimawh tih sawiin, "Anmahni lamṭang NLUP leh NEDP-te a chhunzawm zel dawn bakah, fûr chhung pawha hman theih turin agriculture link road pawh all weather road-a tihchangtlun mek a ni," a ti a; Mizorama thlai chi bikte chu hun remchang hmasaah State Seed Committee dinin vawn ṭhat a nih tur thu a sawi bawk.

ICAR programme-ah hian MIFCO chairman PC Zoram Sangliana, MLA chu khual­zahawm a ni a; MLA dang Hmingdailova Khiangte, ICAR Meghalaya director Dr N Prakash, Kolasib DC Zarzosanga leh NABARD general manager RK Srivastava te pawh an tel a ni.