Ram venhimna khauh zawka kalpui turin MPC party-in Mizoram sorkar an phût

MPC party office bea­rer-te chu kum 2018-a a vawi khat nan nimin khan an party pisaah an ṭhu­khawm a, kumina Assembly inthlanpui awm tur hmachhawn dan tur leh tunlai Mizoram politics kalphung an thlirho. Thuchhuah siam nghalin, Assam aṭanga Mizorama dan loa lo lut awm thei laka venhimna khauh zawka kalpui turin Mizoram sorkar an phût.

MPC chuan, Assam sorkarin National Register of Citizens (NRC) a kalpui tâk avangin dan loa an state chhunga awmte'n an ṭhenawm state dang­ah luhna remchang an zawng ṭan nia sawiin, chutiang mite Mizorama an lo luh loh nan lo inven lâwk a ṭul thu an sawi a; "Ṭhenawm state-te'n hmalakna an kalpui mek laia Mizoram sorkarin lo inven nana uluk zawka ramri humhalhna leh venhimna lam hawia ke a pên ve lo hi ram leh mipui tan a him lo hleah kan ngai. Assam aṭanga dan loa lo lut awm thei laka venhimna khauh zawka kalpui turin Mizoram sorkar kan phût a ni," an ti.

Mizoramah hnam dang dan loa inbengbel eng emaw zat awmte leh dan loa sumdawngte zalên takin an khawsa mek nia sawiin MPC chuan, "Leilung fate nèkchêpa kan awm mek hi pawi kan ti hle a ni," an ti a; dan loa hnam dang Mizorama khawsate chu dap chhuak a, theihtawp chhuaha hma la turin Mizoram sorkar an phût a ni.

MPC party chuan, Mizoramah sorkar thar, mipui sorkar din a nih ngei theih nana ṭangrual pawl, Zoram Peoples' Movement (ZPM) hmalakna mipuiin an ṭawiawmna zel chu lawmawm an tih thu an tarlang a, "Kalphung thar hmanga Zoram thar siam tura ZPM hmalakna theih­tawp chhuah ṭawiawm turin Zoram mipui kan sáwm a ni," an ti.