Bekang eitute'n damdawi-in an pan

January 19, Zirtawpni tlai khan Mamita bekang eitu mi eng emaw zat chuan harsatna an tawk zui a; Mamit District Hospital-a enkawl tawh zat pawh mi 35 an tling tawh a; damdawi-in dang pan an awm bawk.

Mamit aṭanga thu dawn danin, January 19 tlai/zan khan mi eng emaw zatin bekang an ei a, an ei aṭanga darkar 10 vel hnuah a eitu zinga mi ṭhenkhat chuan harsatna an tawk zui a; pum ná, luak luak, khawsik, kawṭhalote an ni hlawm.

Harsatna neite chuan Inrinni khan Mamit District Hospital an pan a, ṭhenkhat chu admit an ni a; January 21, Pathianni tlai thleng khan damdawi-inah hian mi 35 enkawl an ni a, chu'ngte chu mipa 12 leh hmeichhia 23 an ni.

Bekang ei vanga harsatna neite hi an tam tham deuh avangin damdawi-ina khumin a daih lo a, damdawi-in bathlarah khum dah chawp a ni a; a ziaawm deuhte chu enkawl an nih hnuah chhuahtir leh nghal an ni.

Benkang ei vanga harsatna tawk zingah hian Mamit damdawi-in pan loa Kawrthah lam pante pawh an awm a; Aizawl lam pan nghal, thleng hman loa Rawpuichhip damdawi-ina lut tate an awm bawk.

Bekang ei vanga harsatna neite'n bekang an ei hi mi pahnihin an um a ni a; bekang an ei bâng, la hralh loh leh la um lohte chu Mamit police-te'n lain, loboratory-a endik turin nimin khan Aizawlah an thawn a ni.