Union Minister leh PHE department hotute'n Tui thianghlim sem chungchang an sawiho
Union minister of state for Drinking Water & Sanitation Ramesh C Jigajinagi hoin nimin khan Secretariat conference hall-ah PHE department hotute'n Mizorama tui thianghlim sem leh Swacch Bharat Mission (Gramin) hnuaia hmalakna hrang hrangte an sawiho.
Union Minister Ramesh C Jigajinagi chuan, Mizorama a chàm chhungin mipui tana tui thianghlim pek leh faina lama sorkar hmalaknate a hmunah a hmu thei chu a lawm thu sawiin, "A theih anga rangin Union Secretary kaihhruai team ka rawn kaltir ang," a ti a; PHE official-te chu harsatna an neih hrang hrangte sutkian dan tur chipchiar taka lo sawipui turin a chah.
Ramesh C Jigajinagi chuan, March 2017-ah Mizoram inthiarna mumal awm lohna, open defecation free (ODF) state-ah puan a ni thei tur chu lawmawm a tih thu a sawi a, "Bawlhhlawh sâwngbawl danah erawh nasa taka hmalak a ngai. Ruahtui khâwlah department leh mipuite hmalakna a entawntlak hle a, hei hi uar lehzuala kalpui a nih theih nan sorkar laipui chu ṭanpui tur che u in a inhuam a ni," a ti.
PHE minister Zodintluanga pawhin thu sawiin, "Mizoramah chuan kum 25 kal ta aṭang khan faina lamah hmalak tan a ni tawh a, tuna sorkar laipuiin Swacch Bharat a kalpui mek pawh Mizo mipuite'n an zâwm ṭha hle a ni," a ti a; India ram puma state fai ber nih tumin sorkar, tlawmngai pawl leh mipuite ṭanghoin chak taka hmalak mek zel a nih thu a sawi.
Zodintluanga sawi danin, Mizoramah khawlaiah bawlhhlawh paihte hremna (littering fine) dan siam a ni tawh a, a bawhzui hna chu Aizawl Municipal Corporation kutah dah a ni ang.
PHE department official-te'n sorkar laipui aṭanga sum an hmuh turah harsatna an tawh thu an sawi chungchangah Union Minister rawn zuitu, Drinking Water & Sanitation under secretary Sunil Kumar chuan, sum sanction chu pek chhuah theihin dah a ni reng tawh thu a sawi a, "PHE department-in sum hmuh tawhte hman dan report leh utilization certificate-te an thehluh ve leh pek chhuah a ni ang," a ti.