Union Minister-te Pathiannia lo zin ngaimawh

Zoram Nationalist Party (ZNP) vice president Dr Kenneth Chawngliana chuan nimin khan an party inkhawmah thu sawiin, sorkar laipuia minister-te Kristiante ni serh, Pathiannia an lo kal fo chu an ngaimawh thu a sawi.

Hnam leh sakhua himna ngaihtuah ngam sorkar Mizote'n an mamawh thu sawiin Kenneth Chawngliana chuan, "Pathianniah Union Minister-te Mizoramah programme neiin an lo kal ta fo mai a, Kristiante ni serha lo kal lo tur leh ni danga lo kal zawk tur hian Mizoram sorkar hian ruahmanna a siam ngam lo em ni, tih hi ka zawhna a ni,” a ti.

ZNP Vice President chuan, Congress party kaihhruai Mizoram sorkar chu kil tin aṭangin sorkar hnathawkte leh kohhran hruaitute thlengin sawisel a hlawh mek avangin Mizo mipui zingah sorkar thlak duhna thlí a tleh mek niin a sawi.

Dr Kenneth Chawng­liana chuan, Mizoram sorkar chu tlawmngai pawl leh political party hrang hrangin Mizote sakhua leh hnam himna kawngah duhkhawp lohna nasa tak a thleng mek niin a sawi a, "Mizo mipui zingah sorkar thlak duhna thli a tleh mek a, chumi atan chuan mipuite’n kan hnâwl hnu chhar nawn kan tum tawh lo niin a lang," a ti.