Aizawlah Indian Film Festival ṭan a ni : Chhim turin CM-in mipui a sáwm

Mizoram sorkar leh Innovation India-in ni thum chhung awh tur Indian Film Festival Mizoram chu nimin tlai khan Vanapa Hall-ah an ṭan a, chief minister Lal Thanhawla'n a hawng. CM Lal Thanhawla chuan, film festival hi chhim vek turin Mizo mipui a sáwm.

Chief Minister chuan, film siamtu hlawhtling tak tak, award dawng tawhte'n Mizorama hun an hmang tur chu lawmawm a tih thu sawiin, "Film hi custom, culture leh thil dang tam tak pho chhuahna atana thil tha tak a ni," a ti a; festival chu hlawhtling taka hmang tura duhsakna hlanin, Mizoramin a hlâwkpui ngei a beisei thu a sawi.

Mizoram chu kum 20 chhung rambuai vangin hmasawnna lamah a ṭhan chak loh bik thu sawiin CM Hawla chuan, "Rambuai avangin Mizoram pawh hun rei tak chhung pho chhuah lohin kan awm a, infrastructure lamah pawh kan hnufûm phah a ni," a ti.

Lal Thanhawla chuan, film festival chu Mizoram chu hmun nuam leh boruak nuam tak a ni tih pho chhuahna hun ṭha inṭanna a nih ngei a beisei thu a sawi a; hmun hrang hrang aṭanga film siamtu kalkhawmte chu Mizorama film an siam dawn a nih chuan infrastructure lamah theihtawpa puih a tiam.

Innovation India hotupa, Capt. Rahul Bali chuan, kum thum kal taa Mizoram a tlawh ṭumin Mizoram chu hmun nuam, mawi leh mipui ṭha tak chenna hmun tih a hriat thu a sawi a, "Mizoram mi hriat hlawh ngai lo hian hriat a hlawh theih nan thil tih ka duh a, tun hun hi kan thleng a ni," a ti.

Capt. Rahul Bali chuan, film siamtute'n an vawi khat kalnaah Mizoram an ngainat nghal thu sawiin, "An chám chhungin hmun tam zawk an hmu ang a, engtin tak ngai ang maw?" a ti a; film hmangin Mizoram chu khawvel hriatah pho chhuah a nih ngei a beisei thu a sawi.

Indian Film Festival hawnnaah hian festival puala Asia rama khaw fai ber atana siam tum mek Biate khaw chanchin hmanga short film inelna buatsaiha a ti ṭhate hnenah lawmman sem a ni.

Intihsiaknaa pakhatna Joseph Lalrintluanga hnenah Rs. 50,000, pahnihna Leitlang Pictures hnen­ah Rs. 30,000 leh pathumna F Lalhmingchhuanga hnenah Rs. 20,000 hlan a ni.

Indian Film Festival hi vawiin leh naktukah chhunzawm a ni dawn a, film hrang hrang a duh apiang tana en tura chhuah a nih dawn a, film chungchang sawihona buatsaih a ni bawk ang.

Indian Film Festival Mizorama tel film siamtute hi Mizoram hmun hrang hrang fanpui an ni dawn a, a buatsaihtute chuan Mizorama film siam a nih ngei theihna atan theihtawp chhuah an tum a ni.