Chakma foreigner lakah thubuai ziak lut

December 18, 2017-a Mizo Zirlai Pawl sub-head­quarters, Tlabung hruaitute'n FIR an thehluh angin, police-te'n Lokhi Ran­jan, Khokoysury lakah nimin khan thubuai an ziak lut.

Thu dawn danin, Kho­koysury khaw mi Lokhi Ran­jan hi ram dang mi, Mizo­rama dan loa awm nia an hriat avangin Tlabung MZP-te chuan a lakah Tla­bung Police Station-ah FIR an thehlut a, FIR an thehluh aṭanga ni 36 ral hnuah police-te chuan Lo­khi Ranjan chu an man a ni.

Lunglei Chief Judicial Magistrate-in January 22, Thawhṭannia thuhretute a koh hnuah, Lokhi Ranjan lakah hian nimin khan Tlabung PS-ah Foreigners Act 1946 Section 14 hmangin thubuai ziah luh a ni a; Lokhi Ranjan manna tura thil ṭulte buaipui mek a ni. Zawhna chhangin, Tlabung SDPO K Beihmotaosa chuan, Lokhi Ranjan chu a chenna Khokoysury khua aṭanga hruai tum a nih thu a sawi.

Thu dawn danin, Lokhi Ranjan tih hi hming lem invuah a ni a, a hming tak chu Suro Kanti niin, Bangladesh-a Bak­sury-a piang a ni.