Local purchase-a buhfai lei vangin Sorkar sum cheng nuai 400 hum

Food, Civil Supplies and Consumer Affairs department hotute chu nimin khan an minister John Rotluangliana hoin Tourist Lodge, Chaltlangah an ṭhukhawm. Minister chuan, Mizoram sorkarin FCI aṭanga economic cost-a buhfai a lei ṭhin titawp a, mimal kaltlang (local purchase)-a buhfai a lei tak zawk avangin kum khatah sorkar sum nuai 400 vel hum a nih thu a sawi.

John Rotluangliana chuan, FCSCA department a enkawl chhung­in a ṭha zawnga thil inthlak­thleng tam tak a awm tih sawiin, "VIP tana quota awm ṭhin leh special permit nuaibo a ni a, FCI aṭanga economic cost-a buhfai lei ṭhin kha man man zawkin local purchase-a thlak a ni a, cheng nuai 400 vel zetin sorkar a hlâwk phah a ni," a ti.

FCSCA Minister chuan, Mizoram hmun hrang hranga Supply kudam panna kawng siam ṭhat a ni dawn a, hna thawktu tur firm thlan tawh niin, NABARD sum hmangin hmun 82-ah siam a nih tur thu a sawi.

Boruak inthlak danglam nasa vangin khaw chin chhût thiam a harsa tih sawiin John Rotluangliana chuan, "Fûr chhiat vanglaia mipuiin buhfai ei tur an tlakchham lohna turin buhfai dah khâwl, monsoon stock buaipui ṭan a ṭul. Supply department hna hi nakina thawh tura khêk theih loh, thawh zawh nghal zel ngai a nih avang leh mipui ei leh bar petu kan nih avangin fimkhur leh taima taka thawh a ṭul a ni," a ti.

FCSCA secretary HL Rochung­nunga pawhin thu sawiin, DCSO-te chu an bial chhunga thil thleng an hre hneh hle tur leh harsatna chinfel mai theih chu hotute thu nghak loa hma la ṭhin turin a chah.

Meeting-a an tarlan danin, tun dinhmunah Mizoramah ration card 2,66,766 a awm a, ration card-a hming chuang zat chu mi 12,73,506 an ni. Ration card 2,66,766 zingah hian 1,93,185 chu Aadhaar card nena thlun zawm a ni tawh.

Kum 2017 chhung khan FCSCA department hian district hrang hranga centre 48-ah fûr ruahtui tam laia mipui an ṭàm loh nan thla eng emaw zat daih buhfai chhêk khâwl lâwk a, fûr laiin khaw tam tak, kawng chhia vanga lirtheiin a tlawhpawh theih lohte'n buhfai an dawn theih phah a ni. Kuminah pawh monsoon stock kalpui chhunzawm tum a ni.

Meeting-ah hian DCSO-te'n an huam chhunga an hmalaknate leh harsatna an neih hrang hrangte an sawi a, harsatna chinfel dan turte an sawiho nghal.