KHAWTHLIR

Taxi chesualah thi
Nimin zing khan Phunchawngah taxi, J Lalniliana, Electric Veng, Aizawl ta chesualin kawng thlangah a lum a, a khalhtu Lalngilneia (34), West Phaileng chu damdawi-in thlenpui a nih hnuah a hliam tuar loin a thi. Taxi-ah hian driver bakah mi dang pali an chuang a, passenger-te hi hliam mah se, an na lutuk loa thu dawn a ni.

RSBY inzirtir
Nimin khan Lawngtlai Chief Medical Officer pisa conference hall-ah Lawngtlai RD Block chhunga health worker-te tan Rashtriya Swasthiya Bima Yojana (RSBY/Health Care Enrollment) 2018-19 inhrilhfiahna hun hman a ni. He hunah hian Lawngtlai Block-a health worker 23-te an kal kim a; CMO Dr Thani Pachuau-in kaihruaiin, Mizoram State Health Care Society-a chief executive officer Dr Biakthansangi'n RSBY enrolment kalpui dan a zirtir a ni.

Lirthei tlan phal lo
Traffic SP C Lalthanmawia chuan thuchhuah siamin, SIPMIU, Aizawl-in vawiin aṭangin Bethlehem Vengthlang taxi stand aṭanga Kelzam kâwn inkarah sewerage pipe phûm hna an thawh dawn avangin hna thawh hun chhung, zan dar 9 aṭanga a tûk zing dar 6 inkarah kawngah lirthei tlan phal a ni lo a, kawng sirah lirthei dah phal a ni lo tih a tarlang. Thupek hian vawiin aṭanga hna thawh zawh hma zawng a huam ang.

Chawlhbûk sak tum
MZP chuan thuchhuah siamin, Ch. Chhunga (L), Mizoram chief minister hlui nupui Lalrothangi'n Bairabi khuaa an huan/leiletah chawlhbûk sakna tur ram a pekah Zofate Chawlhbûk sak an tum thu an tarlang a; phal taka ram petu Ch.Chhunga (L) te chhungkaw chungah lawmthu an sawi.

Republic Day
Lunglei DC Lalzarmawii hoin nimin khan DC conference hall-ah Lungleia Republic Day hman dan tur sawiho a ni. Bawrhsap chuan, department-te chu an chanvo ṭha taka hlen chhuak turin a chah.