Kum 2016-ah registrar of births & deaths-te'n Nau piang 22,497 leh thi 6,422 an chhinchhiah

Economics & Statistics department chuan January 22-23 chhung khan Lawngtlai DRO Conference Hall-ah Lawngtlai district-a nau piang leh mitthi chhinchhiahtu, registrar of births & deaths-te intuaitharna an buatsaih. He hunah hian kum 2016 chhung khan registrar of births & deaths (RBD)-te chhinchhiah danin, Mizoram pumah nau piang 22,497 leh mitthi 6,422 an awm.

Training-ah hian January 22 khan RBD-te’n piang leh thi an chhinchhiahna register-te endik leh kum thar atana hmanraw mamawh semna hun hman a ni a; nimin khan RBD chungchanga thil pawimawh hrang hrang zirhoa sawiho a ni.

Nimina zirhonaah Economics & Statistics director Lalchhuanawma Hrahsel chuan chuan, an department-in piang leh thi chhinchhiah an kalpui dan leh kum kal ta report tlangpui a sawi. An hun hmanpuitu, Lawngtlai DC Dr Arun T chuan, piang leh thi chhinchhiah pawimawhzia sawiin, "Ramria awm Lawngtlai district angte tan phei chuan fimkhur a ṭul zual a ni," a ti a, RBD-te chu an pawimawhzia hre thar turin a chah.

Lawngtlaia chief judicial magistrate BT Lala Sakachep pawhin thu sawiin, piang leh thi chhinchhiah kawngah kum khat chhunga chhinchhiahtir an nih loh chuan judicial magistrate first class remtihna chauha certificate pek chhuah theih a nih dan a sawi a; kum 2017 chhung khan Lawngtlai district-ah kum khat liam hnua inchhinchhiahtir tum eng emaw zat aṭangin mi 402 hnenah magistrate-in phalna a pek chhuah thu a sawi.

Training-a an tarlann danin, kum 1985 aṭangin Birth & Death Annual Report kum tin tihchhuah a ni a, kum 2016 thleng khan vawi 31 tihchhuah a ni tawh. RBD-te'n kum 2016 chhung khan Mizoram pumah nau ­piang 22,497 leh mitthi 6,422 an chhin­chhiah a; Lawngtlai district bikah nau piang 2,452 (mipa 1,209 leh hmeichhia 1,243) leh mitthi 489 (mipa 291 leh hmeichhia 198) an chhinchhiah a ni.

Tun dinhmunah Mizoram pumah piang leh thi chhinchhiahtu (RBD) 843 an awm a, chu’ng zinga 103 chu damdawi-ina mi an ni. Lawngtlai district-ah RBD an 132 awm a, chu’ng zinga pakua chu damdawi-ina mi an ni. Lawngtlai district chu LADC area leh CADC area-ah ṭhen a ni a; LADC area-ah RBD 81 awmin, CADC area-ah 51 an awm thung.