Sorkar kum kal mekah Siaha dist-ah Nausen kum khat hnuai lam 5 thi

Siaha District Development Coordination and Monitoring Committee (DCCMC/DISHA) chu nimin khan DC Conference Room-ah an ṭhu a, chairman CL Ruala Lok Sabha MP-in a kaihruai. Siaha district-ah sorkar kum kal mek 2017-18-a April-December inkarah damdawi-inah nausen kum khat hnuai lam panga an thih thu leh nau chunga nu thi pakhat a awm thu an tarlang.

Meeting-a Siaha Chief Medical Officer-in a tarlan danin, April-Decem­ber 2017 chhungin Siaha district-a damdawi-inah nausen thi panga leh raicheha thi nu pakhat an awm a; nau piang 331 an awm a, chu'ng zinga 247 chu damdawi-ina piang niin, 84 chu in lama piang an ni.

Thla kaw chhungin sikserh vanga thi an awm lo a, ngawr (TB) vei hmuh chhuah thar mi 10 an awm. Siaha district chhunga Health sub-centre-te'n health worker an nei vek tawh a; chutih laiin, kum kal mekah RKS fund an dawng lo.

DRDA tarlan danin, MGNREGS hnuaiah inhlawhna ni 38 siam a ni tawh a, ni 10 dang inhlawhna tur sum an dawn tawh. PMAY-G hnuaiah chenna in 188 sakna tur first instalment Rs. 1,30,000 pek chhuah a ni tawh a, Tipa (Tuipang) RD Block-a hna thawhna tur BADP aṭangin cheng nuai 243 an hmu a, nuai 106 an hmang tawh.

SSA midday meal-in primary school 118 leh middle school (UPS) 76 a tuam a; mahse, buhfai leh mamawh dang an la dawng lo a, chawchhumtu lawmman erawh October leh November thla atan an dawng tawh thung.

PMGSY hnuaiah Siachangkawn-Vawmbuk kawng leh Kaochao-Saikao kawng siam zawh a ni tawh a; hna kal laite chu 2017-18 chhunga zawh hman an inbeisei a ni.

Meeting-ah hian Siaha bialtu MLA Dr K Bei­chhua leh sorkar official-te leh tlawmngai pawl ṭhenkhat aiawhte an tel a ni.