Kum kal mekah Lunglei district-ah HIV hrik pai mi 48 hmu chhuak

Lunglei District Development Coordination and Monitoring Committee (DISHA) chu January 22, Thawhṭanni khan Lunglei DC Conference Hall-ah chairman CL Ruala, Lok Sabha MP kaihhruaiin an ṭhukhawm a; sorkar kum kal mek 2017-18 ah Lunglei district-ah HIV hrik pai hmuh chhuah thar mi 48 an awm thu an tarlang.

Meeting-a an tarlan danin, April-December 2017 chhungin mi 2,645-te thisen endik a ni a, chu'ng zinga mi 48 chuan HIV hrik an pai tih hmuh chhuah an ni. Sikserh vei mi 1,330 hmuh chhuah niin, chu'ng zinga mi 1,188 chu Malaria Pf an ni a, denque vei mi 13 hmuh chhuah a ni.

Kum 2016-17 chhungin Lunglei district-ah nausen kum khat hnuai lam thi 42 an awm a, infant mortality rate (IMR) chu 18 a ni a (nau piang 1,000 zelah 18 an thi tihna); sorkar kum kal mekah April-December 2017 chhungin nausen thi 27 awmin, IMR chu 15 a ni a, nu nau chunga thi pakhat a awm.

Sorkar kum kal mekah Lunglei district pumah MGNREGS hnuaiah ni 47 inhlawhna siam a ni tawh a, September 2017 thlengin district chhungah job card nei mi 35,517 an awm.

Lunglei district-ah hian individual house hold latrine (IHHL) hnuaiah ek-in sak tur 950-ah 690 sak zawh a ni tawh a, kawngpui dung km. 82.23-ah thing phun a ni. Anganwadi center 20 sak turah 11 sak zawh a ni tawh a, PMAY-G hnuaiah in 865 sak tura ruahman mek niin, PMKSY(WD) hnuaiah project pahnih kalpui mek a ni. SSA Mission midday meal-in sikul 552 a tuam a, zirlai 28,783-in chawchhun an dawng.