Roll aṭanga Bru-te paih hun turah ECI aṭangin thu dawn a la awm lo

Tripura-a refugee camp-a awm Bru, Mizoram khua leh tuite Mizoram electoral roll aṭanga paih hun turah Election Commission of India (ECI) aṭangin Election department chuan thu dawn a la nei lo.

Tarlan tawh angin, Ministry of Home Affairs (MHA), Mizoram sorkar, Tripura sorkar leh Bru pawl hrang hrangte'n inremna an ziah angin, Tripura relief camp-a Bru awm mekte chu Tripura-ah an awm hlen tawh dawn a ni. Bru-te chu Mizoram electoral roll aṭanga paih an ni dawn a, Tripura electoral roll-ah thun a ni ang.

Vanglaini palai zawh­na chhángin Election department hotute chuan, electoral roll aṭanga Bru-te paih turin ECI aṭangin thu an la dawn loh avangin hmalakna an la neih loh thu an sawi a, "ECI aṭanga instruction kan hmuh hma chuan keimahni thu chuan hmalak theih a ni lo," an ti.

Election department hotute sawi danin, ECI aṭanga instruction an dawn hunah Bru-te'n vote an neihna district-a Election hotute chu Bru-te electoral roll aṭanga paih turin hma la tura hriattir an ni ang a; district-a Election hotute chu Tripura refugee camp-ah kalin, Mizoram electoral roll aṭanga paih turte an endik dawn a ni.

Mizorama inthlanpui hnuhnung ber, Lok Sabha inthlanah khan Tripura relief camp-a Bru zingah Mizoram electoral roll-a awm mi 11,990 an awm. Lok Sabha inthlan hnuah Bru hruai kîr hna kalpui leh a ni a, chhungkaw 200 chuang Mizoramah an lêt a ni.

Tripura-a Bru-te chuan Mizorama district pathumah vote an nei a; district-a vote an neih dan chu - Mamit district-ah 9,130, Kolasib district-ah 1,974 leh Lunglei district-ah 886 a ni. MLA bial ang chuan, constituency pakua - Lunglei South, Thorang, West Tuipui, Tuirial, Serlui, Kolasib, Hachhek, Dampa leh Mamit bialah vote an nei a ni.