Mizoram-Assam ramri-ah buaina Buarchep-ah kut inthlak & bomb puak : Aitlangah boruak thar a awm lo

July 10, Inrinni khan Phai­nuama Buarchep hmuna Chal­chhunga huanah Assam lamin kawng an sial avang leh Mizo thlai eng emaw zat an tihchhiat avangin buaina a chhuak a, kut an inthlak. Vairengte ram, Aitlang lamah erawh boruak ṭha lo thar a awm rih lo.

Vanglaini thu dawn danin, Assam hoin Buarchep hmuna kawng an siam lai chu huan neitute leh Phainuam khawtual mi ṭhenkhatte'n an lo dang a, lei laihna JCB-te chu an lêttir leh a ni. A hnuah Assam police eng emaw zat thlen belhin, lei laih dodaltute chu an nawr let a, kut an inthlak a ni. He thu ziah lai thleng hian Assam lamin kawng laih hna an la chhunzawm.

Assam lamin lei an laih avang hian Inrinni vêk khan Buarchep lamah Mizoram police tam zawk tirh an ni a, Assam lam chu luikawr piah lam china hmathar lâk tum lo turin an hriattir a ni. Assam lam pawhin he thu ziah lai thleng chuan luikawr piah lamah hna thawh an tum lo a, Inrinnia lei an laihna hmunah, khawtual mite'n an lo danna laiah erawh chuan an la lâi chhunzawm zel thung.

Thu dawn danin, Assam lam hian luikawrah hian lei dawh a, kawng sial chhun­zawm an tum a nih rin a ni a; mahse, luikawr bulah Mizoram police an inkulh a, luikawr piah lama Assam lamin hmalak an tum a nih chuan lo dang tura tih an ni. Luikawr piah lamah hian Mizo in a awm lo a, huan leh thlai erawh an nei.

Buarchep chhevelah hian Inrinni tlai dar 2 vel khan bomb a puak a, chumi hnuah nimin zingah ṭum hnih leh tlai dar 5 velah ṭum khat a puak leh a ni. Bomb puak hi gelatine nia hriat a ni a, a tipuaktute hriat a ni lo a, thil tihchhiat a nei lo.

Hetih lai hian, tun hnaia Assam leh Mizoram police-te innawrna Vairengte Aitlang ramah chuan boruak ṭha lo thar a awm lo a, state pahnih police-te chu an awmna hmun ngaiah an la inkulh ve ve a ni.