KHAWTHLIR

Tanpuina hlân
Central YMA-in TNT, Muanna Veng ṭanpuina tur sum a dawn khawm Rs. 1,47,000 chu nimin khan CYMA office bearer pathum - vice president Lalhmachhuana, general secretary Prof. Lalnuntluanga leh Finance secretary Roneihthanga ten an hlân. CYMA hian TNT hnenah hian June 26 khan Rs. 7,94,640 an hlân tawh a, nimina an hlan nen a vaiin Rs. 9,41,640 a tling. Sumte hi YMA sub-headquarters, group leh branch-te leh mi ṭhahnemngai 88-te thawh khawm a ni.

Containment zone
Bawngkawna chhungkaw 173 awmna, Kulikawna chhungkaw 27 awmna leh Ramthar Venga chhungkaw 51 awmnate chu nimin khan containment zone-ah puan a ni. Armed Venga chhungkaw pali awmna containment zone chu hlih a ni thung.

Mi 52 man
Aizawl district-a Covid-19 executive duty-te chuan July 10, Inrinni khan Mizoram (Containment and Prevention of Covid-19) Act, 2020 bawhchhia mi 52 an man a, an pawisa chawitir tlingkhawm chu Rs. 6,500 a ni. Dan bawhchhiate an mannate chu veng 13 - Chaltlang Lily Veng, Edenthar Veng, Chanmari, Zarkawt, Zuangtui, Armed Veng, Armed Veng South, Saron Veng, Tuithiang Veng, Tuivamit, Bungkawn, Bethlehem Veng leh Tlangnuam-te a ni.

Sorkar phut
PC Party chuan thuchhuah siamin, Assam mite'n Phainuam ram Buarchep phaia JCB hmanga kawng siam tuma hma an rawn la chu hriatthiam harsa an tih thu an tarlang a, "A rang thei ang bera Assam mite nawrkir turin Mizoram sorkar kan phut," an ti.

Hnathawh enfiah
Govt. deputy chief whip Lalrintluanga Sailo, MLA chuan July 10, Inrinni khan PHE department-in Reiek leh a chhehvel khuate tui harsatna su kiang tura hma an lakna, Feeding and Pumping Water Supply Scheme for Reiek (FPWSSR) a tlawh a, hna thawktute nen hmalak dan leh hmachhawpte an sawiho. FPWSSR hi Dihmunzawl aṭanga tui lakna niin, Ailawngah tui pump-na dah a ni a; Reiek tlangah tuizem lian a awm a, mi 3,519 châwm thei turin Rs. 12,96,62,510 sênga siam tur a ni.