Mizoram sorkar hmalakna hnuaiah Hmasawnna a awm mek zel - Larsap

Governor PS Sree­dharan Pillai chuan nimin khan Khawzawl a tlawh a, Mizoram sor­kar hmalakna hnuaiah hmasawnna a awm mek zel niin a sawi.

KVK, Khawzawla district official, village coun­cil hruaitu, politi­cal party aiawh leh koh­hran hruaitute nen an inkawmnaah thu sawiin Larsap chuan, "Mizo­ramah sorkar hmalakna hnuaiah hmasawnna a awm mek zel a ni. Mizo mipuiten ṭan an laka sorkar hmalakna an thlawp ṭhat phawt chuan India rama state hmasawn ber kan ni thei," a ti.

Governor chuan ziak leh chhiar lamah ṭan lak zel a ṭul thu sawiin, "Ziak leh chhiar thiam tam lamah pawh Kerala khumin pakhatna nih kan tum tur a ni. Tin, faina kawngah entawn tlak kan niin ka hria; district hospital tam tak ka tlawh tawh aṭangin hei hi ka chiang," a ti a, Mizorama hospital-te chu India ramah hospital fai ber nia a hriat thu a sawi.

Larsap chuan district hmasawnna leh thingtlang khaw lama hmasawnna chu ram hmasawnna atan a pawimawh tih sawiin, "Sorkarin state capital a ngaih pawimawh ang thoin thingtlang mite hmasawnna a ngai pawimawh a ni," a ti.

Governor hian district official, village council hruaitu, political party aiawh leh kohhran hruai­tute chu a hran ṭheuhin a kawm a, DC H Lianzela chuan an district dinhmun leh hmasawnnate a lem nen a sawifiah.