NHM-a thawkte an lungawi lo : A huhoin ni thum an chàwl dawn

National Health Mission (NHM) hnuaia thawkte chuan sorkara an thil phûtte tihhlawhtlin kim a nih loh avangin naktuk aṭangin ni thum chhung lungawi lohna an lantir dawn a, a huhoin chawlh (mass casual leave) an la dawn.

NHM Employees Union, Mizoram (NEUM) chuan thil phût hrang hrang a neih chung changah July 1, 2021 khan thuchhuah an lo siam tawh a, an thil phûtah Mizoram sorkar chu July 10, 2021 thleng an nghah tur thu an tarlang. An hun tiam chu nimin khan a tàwp a ni.

NEUM hruaitute chuan Vanglaini zawhna chhangin, an thil phût zinga ṭhenkhat chu sorkarin a tihhlawhtlin nghal thu an sawi a, "NHM hnuaia thawk Covid-19 positive mi pariatte inenkawlna senso anmahni intum tawhte chu a pawisa faiin pek lêt an ni a, Covid-19 positive an awm leh pawhin a free-a enkawl kan ni tawh dawn. Thla hnih hlawh kan lak tawh loh pawh kan lâk theih nan sorkarin hma a la nghal a, naktuk (Thawhṭanni) hian an tifel hman mai thei," an ti.

An thil phût ṭhenkhat chu Health Secretary aṭang ringawta tihfel theih a nih loh thu leh ministry level-a ngaihtuah ngai a nih thu an sawi a; chutih rualin, official level ringawta indawr chu an duhkhawp loh thu leh, ministry hotute nena indawr a ngai nia an hriat thu an sawi bawk.

An thil phût tihhlawhtlin kim a la nih loh avangin NEUM hian July 13-15, 2021 chhung mass casual leave an la dawn a, "Hemi chhunga sorkar hotute aṭanga kan lungawina khawp hmalakna a awm lo a nih chuan hmalak chhunzawm zel turin kan inruahman bawk," an ti.

Chawlh an lak chhungin Covid-19 bik leh thil dangah hna khaihlak palh a awm theih tih sawiin NEUM chuan mipui hriatthiamna an ngen a ni. NEUM hian an thil phût chungchangah nimin khan Health Minister hnenah lehkha an thehlut a; an thil phut la tihhlawhtlin lohte chu July 15, 2021 ral hmaa tihlawhtling turin an ngen.

Health Minister hnena lehkha an thehluhah chuan an hnathawh dan leh dinhmunte tarlangin, "Covid-19 avangin hun pangngai aia nasain mahni zawn ṭheuhah theihtawp kan chhuah a. Covid-19 damlo enkawl, sample lak, sample endik, vaccine pek, etc. ah theihtawp kan chhuah a, hripui laka kan himna atana thawh zel hi kan mawhphurhnaah kan ngai a ni," an ti.

NEUM-ah hian NHM hnuaia thawk - doctor, nurse, health worker, laboratory technician, pharmacist, x-ray technician, opthalmic assistant, driver leh office staff dangte an tel a; an vaiin mi 2,175 an ni.

NEUM-in an phûtte
1. A hun taka hlawh pek zel tawh, Finance-a hréng reng loa a hun taka pek chhuah.
2. NHM staff Covid-19 positive-te a thlawna enkawl an nih zel theih nan July 15, 2021 hmaa order tihchhuah.
3. Medical reimbursement an neih theih nan July 15, 2021 ral hmaa notification/order chhuah.
4. NHM-a thawkte a tahtawlin Health department-ah a ngheta lak luh. Sorkar laipui thupek anga kum 5 thawk tawh chin a theih loh pawhin, kum 10 thawk tawh chin tal lak luh.