Hnathawh khawl chi hrang hrang vailiam

Agriculture minister C Lalrinsanga chuan July 10, Inrinni khan Johnson Diesel Sales & Services Depot, Sihhmui aṭangin hmun hrang hranga loneitute'n an inhman ṭawm tur khawl leh hmaraw chi hrang hrang a vailiam a; ramri depa loneitute mamawh ang sorkarin pek zel a tum thu a sawi.

Khawl vailiamte chu kut hnathawktute'n an huan, lo leh leileta an inhman ṭâwm tur custom hiring centre (CHC) kaltlanga ruahman tractor, power tiller, mini power tiller leh kháwl dangte a ni. Minister chuan, tun hnaia ramri hrúla loneitute thlai Assam sorkarin an tihchhiat leh an suam chu a dem thu sawiin, ramri depa loneitute mamawh ang ang chu sorkarin pek zel a tum thu a sawi a ni.

C Lalrinsanga chuan, Covid-19 léng karah sorkar leh department-in loneitute dâwm kân, chawh phûr leh fuih tumin hma an lak mek thu sawiin, "An thlawhhma leh leilette awlsam tak leh awmze nei zawka khâwl hmanga an buatsaih leh an enkawl theih nan khawl hrang hrangte ngaihtuahsak a ni," a ti a; sorkarin khawl mante chu 95% a tum avangin loneitute'n an hmang ṭangkai lo emaw, an hluihlâwn emaw a nih chuan sorkarin a lâk lêt theih thu a sawi.

Kháwl tam zawk chu zauah loneitute'n an inhman ṭâwm tur angin ruahman a nih thu sawiin Minister chuan, "Mimal ta neih záwnga tih chi a ni lo a, CHC-a khawlte chu a nihna ang taka an thar chhuah tihpun kawnga hmang ṭangkai turin ka duh a ni," a ti.

Kháwl vailiamte chu Sub-Mission on Agricultural Mechanization (SMAM) hnuaia ruahman a ni a, sorkar laipuiin 90% tumin, kum 2020-21 chhungin cheng nuai 954.89 dawn a ni.

Sum hmang hian khawl leh hmanraw chi hrang hrang subsidy-a pek chhuah tum a ni a; chungte chu - tractor 52 leh a kaihhnawih bungrua, buh sengna khawl paddy thresher 40, power tiller 150, mini power tiller 100, hnim sâm faina khawl brush cutter 400, knapsack sprayer 100, lei lehna khawl vir thei rotavator 20, fu herna khawl 75 leh kurtai chhuanna bel lian 85 a ni.

Kum 2013-14 aṭanga 2021-21 thlengin Agriculture department chuan loneitute tan subsidy-in power tiller 1,110 leh mini power tiller 354 a pe chhuak tawh a, kum 2013-14 aṭangin loneitute'n khawl an inhmanṭawm theihna custom hiring centre 181 din a ni tawh bawk.