CM-in Governor kal chhuak tur a thlah

Governor kal chhuak PS Sreedharan Pillai chuan July 10, Inrinni khan Mizoram a chhuahsan a; Raj Bhavan-ah chief minister Zoramthanga, Health minister Dr R Lalthangliana leh IPR minister Lalruatkima ten an thlah a, ngaihhruihna thilpek pein, a hna thar atan duhsakna an hlân.

PS Sreedharan Pillai chuan, Mizoramah kum hnih tling lo deuh a awm tih sawiin, Mizoram leh Mizo mipui a ngainat thu a sawi a, "Mizoram ka rawn thlen aṭanga rei lo te chhungin kei leh ka chhungte chuan Mizoram hi mawi kan tih bakah nuam kan ti a, Mizoram dung leh vâng kan fang chhuak a ni," a ti a; Mizoram hmun hrang hranga mipuite nen inhmelhriatna an nei thei chu vannei a intih thu a sawi.

Governor a nih aṭanga rei vak loah Covid-19 hripui a léng ṭan tih sawiin Sreedharan Pillai chuan, "Hripui léng donaa Mizoram sorkar hmalaknate a chhuanawm. Covid-19 a la reh loh avangin Mizoram mipuite pawh sorkar ṭha taka thawhpui zel turin ka ngen a ni," a ti.

PS Sreedharan Pillai chuan, Mizorama an awm chhung rei lo têa Mizoram mipui duhsakna leh thlàwpna te, chanchinbu mite'n ṭha taka an thawhpui avangtein a lawm thu a sawi a; a awm loh hnuah pawha a hlahril phuah, Mizoram mawi a tihzia a puan chhuahna 'Oh, Mizoram' chu chhiar a nih apianga amah hre chhuak leh ṭhin turin mipui a ngen a ni.

CM Zoramthanga chuan, PS Sreedharan Pillai te nupain Mizoram leh mipui tan theihtawp an chhuahnaah lawmthu sawiin, "Covid-19 léng avanga hun harsa state-in a paltlang laia Raj Bhavan lamin a remchan ang anga theihtawp in lo chhuah ṭhin hi a lawmawm," a ti a; a hna thar chu ṭha taka thawk turin duhsakna a hlân.

PS Sreedharan Pillai thlahna hun hi Ṭhuampui Helipad-ah buatsaih tum ni mah se, khawchhia avangin Raj Bhavan-ah sawn a ni.

PS Sreedharan Pillai hi October 25, 2019 khan President Ram Nath Kovind chuan Mizoram Governor 21-na ni turin a ruat a, November 5, 2019 khan Raj Bhavan-ah rinawmna thu tiamtira lak luh a ni. President-in July 6-a a ruat angin Goa Governor a ni zui ang.

Governor pisaa thawkte hnen aṭanga thu dawn danin, Governor thar tur Dr Kambhampati Hari Babu chuan chawlhkar khat vel hnuah a hna thar a rawn zawm dawn a ni.