COVID-19: Mizoram dinhmun : Hripui vei 979 hmuh belh a ni

July 9, Zirtawpni leh July 10, Inrinni khan Mizoramah Covid-19 vei mi 979 hmuh chhuah a ni a, July thlaah mi 3,501 hmuh chhuah a ni tawh. Inrinni leh nimin khan hripui laka fihlim tawh mi 354 chhuahtir an nih laiin, hripui vangin mi panga an thi.

Covid-19 vei July 9-a hmuh chhuahte chu mi 537 niin, mipa 264 leh hmeichhia 273 an ni a; ZMC laboratory-a hmuh chhuah 94, TrueNAT-PCR hmanga hmuh 30 leh RAT-a hmuh 413 an ni. Inrinnia hmuh chhuah mi 442-te chu mipa 213 leh hmeichhia 229 an ni a; ZMC-a hmuh 36, TrueNAT hmanga hmuh 53 leh RAT hmanga hmuh 353 an ni.

July thla ni 10 chhungin hripui vei mi 3,501 hmuh chhuah a ni tawh a, chawhrualin ni tin mi 350 vel hmuh chhuah an awm ziah ang a ni. IDSP record angin, Mizoramah Covid-19 vei mi 23,993 hmuh chhuah a ni tawh a, mipa 13,495 leh hmeichhia 10,498 an ni. Nimin tlai dar 5 thleng khan mi 19,479 (81.19%) chhuahtir an ni tawh a, mi 108 (0.44%) thi tawhin, enkawl mek mi 4,406 (18.37%) an awm.

July 9, Zirtawpnia swab sample endik dan chu - ZMC laboratory-ah Aizawl leh Serchhip district-a mi 940, TrueNAT hmangin district 10-ah 308 leh RAT hmangin district 11-ah 2,641 a ni a, a vaiin sample 3,939 (mipa 2,275 leh hmeichhia 1,604) niin, chuta ṭanga hripui vei hmuh chhuah 537 chu 13.49% a tling.

Mi 537-te chu natna lang chhuak 193 leh lang lo 344 an ni a; tualchhunga kái 527 leh state páwn aṭanga lut 10 niin, tualchhunga kái zingah chuan kàina chin hriat loh mi 178 an awm. July 10, Inrinnia swab sample endik dan chu - ZMC laboratory-ah Aizawl district-a mi 1,216, TrueNAT hmangin district pariatah 403 leh RAT hmangin district 11-ah 2,465 a ni a, a vaiin sample 4,084 (mipa 2,263 leh hmeichhia 1,821) niin, chuta ṭanga hripui vei hmuh chhuah 442 chu 10.82% a tling.

Hripui vei hmuh thar mi 442-te chu natna lang chhuak 250 leh lang lo 192 an ni a; tualchhunga kái 438 leh state páwn aṭanga lut pali niin, tualchhunga kái zingah chuan kàina chin hriat loh mi 206 an awm. July 9&10-a hripui vei hmuh chhuah mi 979 zingah naupang kum tling lo 300 chuang awmin, a zatve tling lo deuhin symptom an nei a, nausen kum khat tling lo pariat awmin, symtom nei an awm nual. Kum 60 chung lam mi 50 vel awmin, an zinga 20 chuangin symptom an nei a; kum 80 chung lam mi pathumte'n symptom an nei vek a ni.

Nimin khan tlai dar 5 thlengin hripui laka fihlim tawh mi 92 chhuahtir an ni a; Inrinni khan mi 262 chhuahtir an ni bawk.