Mizoramah Covid-19 vei thi mi 108 an tling tawh

July 10, Inrinni leh nimin khan Covid-19 vei mi panga an thi a, nimin tlai dar 5 thlenga Mizorama Covid-19 vei thi chu 108 an tling tawh.

Covid-19 vei State Referral Hospital (ZMC)-a enkawl lai PC Thangpuia (80) h/o 00000, Chawngte-L chu July 10, Inrinni tlai dar 5 khan a thi a, nimin khan vui a ni. Amah hi Covid-19 positive a ni tih June 19, 2021-ah hmuh chhuah a ni a, June 29 aṭangin SRH-ah enkawl ṭan a ni.

Inrinni vêk zan dar 7 khan Vanhnuailiana (51) s/o Lalpuiliana Sailo (L), Ramthar Veng, Aizawl chu July 10 zan dar 7 khan SRH-ZMC-ah a thi a, YMA Hall-ah lumen niin, nimin khan vui a ni. Covid-19 positive a ni tih June 27, 2021-ah hmuh chhuah a ni a, July 3-ah SRH-ah dah luh a ni.

Inrinni zan dar 7:30 khan Covid-19 vei enkawl lai Saibawii (89) w/o Rokunga (L) College Veng, Aizawl an inah a thi a, stroke nei sa a ni. Amah hi Covid-19 vei a ni tih July 6, 2021 khan hmuh chhuah a ni a, inah enkawl niin, damdawi-inah lak a ni lo.

Nimin zing dar 7 khan Zaihmingthanga (31) s/o Lalbeiseia, Rulpuihlim chu Covid-19 avangin SRH-ZMC-ah a thi a, nimin khan Rulpuihlimah vui a ni.

Thu dawn danin, Zaihmingthanga hi Maubawk, Aizawla khawsa mek a ni a, natna dang a neih avanga July 9, Zirtawpnia damdawi-ina a inentirnaah Covid-19 vei a ni tih khan hmuh chhuah niin, SRH-ah enkawl nghal a ni a; hripui a vei tih hmuh chhuah aṭanga ni hnihnaah a thi a ni.

C Lalliana (80), Mission Vengthlang chu nimin zing dar 8:10 khan an inah a thi a, a thih hnuah Covid-19 positive a ni tih hmuh chhuah niin, Covid-19 vanga thiah chhiar tel a ni. Mission Vengthlanga mi pakhat, June 24, 2021-a Vairengtea thi chu a thih hnuah Covid-19 positive a ni hmuh a nih avangin Covid-19 vanga thi-ah chhiar tel a lo ni tawh bawk.