CM hmalak khalh chi a ni lo - ZPM

ZPM party chuan thu­chhuah siamin, Mizoram leh Assam ramria buaina thleng mek chu an ngaihven reng thu an tarlan rualin, Chief Minister-in ramri chinfel dan thurûk a hriat avangin hma lo lak khalh chi nia an hriat loh thu an tarlang a; Assam sorkar mite'n Mizote thlai leh bungrua an tihchhiatsakte chu a hen tâwk zangnadawmna pe turin Assam sorkar an phût tih an tarlang bawk.

ZPM chuan, "Chief Minister-in ramri chinfel dan thurûk a hriat thu chiang takin mipui hriatah a sawi tawh a, a thurûk hriat chu a puan chhuah hma leh a taka a chantir hma chuan ramri chinfel kawngah hma lo lâk khalh chi niin kan hre lo," an ti.

Ramri venhim hna thawk mektu police-te'n ei leh bâr leh tawm hulna turah harsatna nasa tak an tâwk mek tih sawiin ZPM chuan, "Huaisen zawka hna an thawh theihna turin ramri vengtu sipaite harsatna tawh mek hi sorkarin ngaihvenin thuam ṭha thuai rawh se," an ti a; "Assam sorkar mi tirhte'n Mizoram mite bungrua leh thlai an tihchhiatsakte hi a hen tâwk zángnadawmna pe turin Assam sorkar kan phût a ni," tiin, zangnadawmna an pek ngei theih nan hma chak taka la turin Mizoram sorkar an phût thu an sawi.

ZPM party chuan, Mizo­ram leh Assam ramri velah hmasawnna chi hrang hrang - kawng leh tlang mite himna, adt. chungchangah chak lehzualin Mizoram sorkarin hma la se an duhthu an tarlang a; Parliament House pahniha Mizoram aiawh MP-te'n sorkar laipuiah ramri buaina chinfel dan kawng au chhuahpuiin hma la se an duh thu an tarlang bawk.