CSS hnuaia hmalakna Khawzawlah thlirlêt

Khawzawl bawrh-sap Zothan­mawia kaihhruaiin DC conference hall-ah Khawzawl District Rural Development Agency (DRDA) hnuaia centrally sponsored schemes (CSS) hrang hrang kalpui dan thlir lêtna, first quarter review meeting neih a ni.

Ṭhutkhawma tarlan danin, Khawzawl district-ah hian MGNREGA hnuaiah job card nei chhungkua 8,441 an awm a, kum kal mekah ni 34 inhlawhna siam tawh niin, hna 353 thawh a ni. Job card neitute hnenah an bank account kaltlangin an hlawh Rs. 6,68,57,486 thun a ni tawh. July 2021 chhungin ni ruk inhlawhna siam leh tum a ni.

Jal Shakti Abhiyan Catch the Rain campaign kal mekah ruahtui khâwlna tur leh tuihna humhalhna lam hawi hna chi hrang 49 thawh a ni tawh a; PMAY-G hnuaiah Khawzawl district-a mi 52-in in sak ṭan­puina an dawng a, an sa zo vek tawh. Sorkar laipuiin in sak ṭanpuina a duan thar Awaas+ software kaltlangin mi 357-te pek leh a ni dawn.