National Voters Day hman a ni Kuminah VVPAT hman a ni dawn

Nimin khan India ram hmun dang rualin Mizoramah pawh National Voters Day vawi 8-na hman a ni a; a hmanna pui ber, Aizawlah chuan Synod Conference Centre-ah Governor Lt. Gen. Nirbhay Sharma hoa hman a ni. He hunah hian, kumin inthlanah voter verified paper audit trail (VVPAT) hman a nih dawn thu an tarlang.

Governor chuan, kohhran leh tlawmngai pawlte thawhhona avangin Mizorama inthlan dik leh fel fai awm ṭhin tih sawiin, chu chu hmun danga awm ve zen zen lo a nih thu a sawi a, "India ram chhung mai ni lo, khawvel ram dangte pawhin hria se ka duh. Tun hnaia Special Summary Revision pho chhuahah mipa aiin hmeichhe voter tam zawk mah se, inthlanah hmeichhe candidate an la tlem hi a pawi hle," a ti.

Hmeichhiate dinhmun chawikan a nih theih nan inthlanah emaw, sorkar inrêl­bâwlnaah emaw dinhmun sang zawka dah an ngaih thu sawiin Larsap chuan, pian­phunga rualbanlote'n mipui rorelnaa an chanvo dik tak an hmuh theih nan, an tana thawk zel turin kalkhawmte a sáwm.

Lt. Gen. Nirbhay Sharma hian vote nei tharte hnenah voter ID (EPIC) a sem a; Election Quiz leh Drawing Competition-a ti ṭhate hnenah lawmman a sem bakah, booth level officer (BLO) leh assistant electoral registration officer (AERO) hna thawk ṭhate hnenah lawmman a hlan a ni.

Chief electoral officer (CEO) SB Sha­shank pawhin thu sawiin, kumina Mizoram Assembly inthlanah VVPAT hman tum a nih thu a sawi a; National Voters Day lawmna puala inelna hrang hrang an buatsaihte a sawifiah nghal.

National Voters’ Day thupui, 'Accessible elections' tih sawitu, Dr Lalnunthara, Persons with Disabilities commissioner chuan, pianphunga rualbanlote tana harsatna awm loa vote thlak chu an chanvo a nih thu sawiin, CEO chu Supreme Court-in thupek anga polling station tina in sak hmang tidanglam tura accessibility plan ruahman turin a ngen a, "Tlawmngai pawl leh zirlai naupangte pianphunga rualbanlote'n vote an thlak dun nan theihtawp chhuah turin ka ngen a ni," a ti.

National Voters’ Day hmannaah hian chief election commissioner Om Prakash Rawat-a thuchah leh VVPAT chungchang ngaihthlak leh thlirho a ni.