February 2018 chhunga CADC inthlan Buatsaih turin MNF-in Governor an ngen

MNF party hruaitute chuan nimin khan Governor Lt. Gen. Nir­bhay Sharma an hmu a; kumin February thla tàwp lamah Chakma Auto­nomous District Council (CADC) inthlan a hun dawn avangin, a hun takah inthlan buatsaih tura ngenna ziakin an thehlut.

Governor an hmuh­naah hian MNF hruaitu - treasurer Vanlalzawma, MLA pahnih K Sangṭhuama leh Lalruatkima, H Rammawi leh Legal Board secretary TJ Lal­nun­tluanga te an kal a; MNF general headquar­ters ngenna bakah, CADC-a MNF district headquarters leh BJP district headquarters-te'n February thla tawp lama inthlan buatsaih tura an ngenna an thehlut nghal.

MNF hruaitute chuan, CADC inthlan hnuhnung ber chu chhuanlam tling tak awm lo leh mipuite duh dan ni loin thla khat aia reia sawn hlat a ni a, April 17, 2013-ah inthlan buatsaih a ni tih an sawi.

Tunah hian CADC-a Congress kaihhruai sorkarin inthlan hun dik taka inthlang lo a, inthlan hun sawn hla leh turin an nawr mek tih sawiin MNF hotute chuan, "Hei hi MNF chuan ṭha kan ti lo a, a hmaa an lo inthlan ṭhin hun pangngai zûl­zuiin February thla chawhnu lamah CADC inthlanna hi buatsaih ngei ni se kan duh," an ti.

MNF chuan, CADC chu ram kilkhâwra awm a ni a, kawng chhia nen, ruahsur hun a thlen leh hma ngeia inthlanna buatsaih ṭha an tih thu an sawi a, "Inthlanna tura hmanruate pawh peih sa vek niin a lang a, sikul, college leh university exam awm mai tur tibuai lo tur leh sorkar financial year tawp tur tibuai lo turin CADC inthlanna hi February 2018 tawp lama tihfel vek ni thei se," an ti a; February thla chhunga inthlanna buatsaih hman a nih loh pawhin, CADC sorkar term kal lai pawtsei lo a, a hun taka inthlanna buatsaih ngei turin Go­vernor an ngen a ni.