KHAWTHLIR

Drone khap
Aizawl SDM chuan thupek chhuahin, Republic Day-ah ṭha taka venhimna kalpui a nih theih nan thupek a chhuah a; Lammual chung, Raj Bhavan compound chung leh Chief Minister bangla chungahte remote control hmanga drone/aerial camera leh chutiang lam chi reng reng thlawhtir leh hman khap a nih thu a puang.

Thisen pe
Higher & Technical Institute of Mizoram (HATIM), Lunglei NSS chuan nimin khan an college-ah blood donation camp an huaihawt a, mipa 74 leh hmeichhia 30-te'n thisen unit 104 an pe. ICFAI University, Mizoram pawhin nimin khan Aizawl Civil Hospital tan thisen unit 90 an pe a, a petute mipa 74 leh hmeichhia 16 an ni.

NLUP sem
AH&Vety department chuan nimin khan NLUP thlangtu mi 66 hnenah Lengpuiah vawkte an sem a, bialtu MLA John Rotluangliana'n a hmanpui. Chhungkaw pakhat hnenah vawkte paruk zel pek a ni.

Morgue van pe
ABCI Infrastructures Pvt. Ltd. chuan CSR hnuaia ruang phurhna (morgue van) an lei chu nimin khan Ramhlun South Branch YMA hnenah an hlan a, hlanna inkhawm Ramhlun South YMA Hall-a buatsaih chu Health minister Lal Thanzara'n a hman pui.

Pastor Pension Inhmuhkhawm
Vawiin chawhma dar 11 hian Synod Office-a devotion room-ah Presbyterian Pastor Pension Fellowship-in General Meeting an nei dawn a, Revd. Chuauṭhuama buatsaih, 'Rorelna dik: Kohhranah' tih an zirho dawn.

In kâng
January 24, Nilaini zan dar 8:30 vel khan Bawngkawn traffic point bula VL Tawna (L) h/o Lalhlimpuii in, RCC building chu a kang a; in chhawng hniha in sakna bungrua, puan leh mutbute leh 99 dawr a kâng chhe hle. Kangmei a chhuak tih an hriat ve leh Fire & Emergency-in kangṭhelh motor hmang a ṭhelh hna an thawk nghal a ni.