District tinah National Voters Day hman a ni

Nimin khan Mizorama district head­quarters tinah National Voters Day vawi 8-na hman a ni a, district bawrhsap, District Election Officer ni bawkte'n an hmanpui. Kumina Day thupui chu 'Accessible election' tih a ni.

Disterict hrang hranga National Voters Day hmannaah hian thianghlim leh rinawm taka vote thlak tura intiamna thu sawiho a ni a; Assembly biala tina BLO thawk ṭhate hnenah chawimawina hlan a nih bakah, vote nei thar mi ṭhenkhat hnenah voter ID hlan a ni. Chief Election Commissioner (CEC) thuchah chhiarchhuah a ni bawk.

National Voters Day hi Mamitah chuan IPR Conference Hall-ah hman a ni a, additional DC Jacob Lalawmpuia khuallian a ni. Khuallian chuan, kumina vote nei tharte a lawmpui thu sawiin, vote nei tharte chu India khua leh tui nihna dik tak leh ram rorelnaah an ngaihdan leh ṭha an tihte vote hmanga sawi ve turin a chah a, "Kan chhia leh ṭha hriatna thiang tak nen kan vote hmangin tih ve theih kan nei a ni," a ti.

Inkhawmah hian SDC/AERO Lalzikpuii'n 'Vote neih hlutna' tih a lem nen entirna a, political party hrang hrang aiawhte pawhin thu an sawi. Assembly bial pathuma BLO ṭha pathum thlan chhuahte hnenah lawmman hlan a ni a, chu'ngte chu - Hachhek bialah Lalfakzuala Ralte, Dampa bialah Vanlalzawta leh Mamit bialah K Lalmuankima te an ni.

Kolasib-ah chuan DC pisa conference hall-ah hman a ni a, bawrhsap R Zarzosanga'n a hmanpui. DC chuan, vote thlak chu khua leh tui tana tihmâkmawh a ni tih sawiin, "Vote thlak thei chinte chu India Danpuiin mi puitlingah a ngai a, ram hruaitu thlanna kawngah mahni chhia leh ṭha hriatna hmanga vote thlak ngei a pawimawh," a ti.

Inkhawmah hian Kolasib district-a Assembly bial pathuma BRO thawk ṭha bera thlan mi pathum hnenah lawmman Rs. 3,000 ṭheuh hlan a ni a, chu'ngte chu Kolasib bialah MS Dawngliana, Tuirial bialah S Sumeona leh Serlui bialah R Vanlaltlana te an ni. State Level Election Quiz-a lawmman dawngtute hnenah 7,500 hlan a ni bawk. Elecoral roll thar berah voter 56,581 an awm a, vote nei tha mi 1,914 an awm.

Champhaiah chuan Kahrawt community hall-ah hman a ni a, DC Vanlalngaihsaka khuallian a ni. Vanlalngaihsaka chuan National Voters Day chu India khua leh tui dik tak, electoral roll-a chuang thei tawh chinte an chuan ngei theih nan leh vote thlan hunah vote an thlak ngei theih nana inzirtirna hun a nih thu a sawi. DC hian National Voters’ Day puala Champhai DC pisaa Election Branch buatsaih music video a tlangzarh nghal.

January 15, 2018-a tlangzarh tak electoral roll 2018-a a lan danin, Champhai district-a MLA bial pangaah voter 84,447 an awm a, hmeichhia 42,569 leh mipa 41,878 an ni. Inkhawmah hian DC pisaa thawk te, media mi te, BLO, supervisor, tlawmngai pawl hruaitu te, V/C te, political party aiawhte leh sikul naupangte an tel.

Serchhipah chuan bawrhsap Sangchin Chinzah hoin DC conference hall-ah hman a ni. DC chuan, zalenna awm lohna leh tihluihna hmanga rorelna ram hrehawmzia hre chiangtute'n zalen taka mipuiin ram hruaitu an thlanna rama awm an châk ṭhin tih sawiin, "Kei ni khawvela democracy ram lian bera chengte hian zalenna hlutzia kan hriat thar a ṭul," a ti a; mipuiin kan duh zawng ram hruaitu an thlan theih nan electoral roll felfai tak neih a ngaih thu a sawi.

National Voters Day hi Lungleiah chuan Convention Centre-ah hman a ni a, election officer James Lalnithanga'n kaihruaiin, DC Lalzarmawii khuallian a ni. Bawrhsap chuan, India rama cheng 50% vel chu ṭhalai, kum 35 hnuai lam an ni tih sawiin, "Ṭhalaite hi democracy rama mawhphurhna an neih hrang hrangte kan hriat fiahtir a ṭul a, inthlannaah vote thlak a pawimawhzia an hriat a ṭul a ni," a ti.

Lawngtlaiah chuan DC pisa tualah hman a ni a, bawrhsap Dr Arun T khuallian a ni. DC chuan, democracy ramah chuan vote thlak chu mipui chanvo leh mawhphurhna a ni tih sawiin, "Mipuite’n zalen taka an duh zawng an thlan hi sorkar ṭha siamna atan a pawimawh a ni," a ti a; kum 2018 inthlanah vote neite chu vote thlak vek turin a sáwm.

Electoral Roll 2018-a a lan danin, Lawngtlai district-ah hian voter 79,207 an awm a, mipa 39,581 leh hmeichhia 39,626 an ni a; kum hmasa aia voter an tamna chu 1,483 (1.91%) a ni.

Siahaah chuan DC pisa conference room-ah hman a ni a, district bawrhsap Harleen Kaur khuallian a ni. DC chuan, EPIC neih tharte a lawmpui thu sawiin, "EPIC nei tlak leh kawl tlak India khua leh tui ṭha in nih a ngai a, chu mawhphurhna chu rilru fîm taka in aiawha ram roreltu tur thlannaah vote inthlak ngei tur a ni," a ti a; vote thlak pawimawhzia mi dangte zirtirtu ni turin a chah.

Siahaah hian Palak biala BLO ṭha berah LC Beirahlu leh Saiha biala ṭha berah V Vanropuia te thlan an ni a, lawmman Rs. 3,000 ve ve hlan an ni. Vote nei thar mi 1,054 hnenah voter ID (EPIC) pek a ni a, chu'ngte chu Saiha biala mi 648 leh Palak biala mi 506 an ni.