Serchhipah ODF zirho

PHE department leh Swachh Bharat Mission (Gramin) ṭang­kawp chuan Swachh Republic Week 2018, January 20-26, 2018 denchhenin nimin khan Sustainability of ODF cum Swachh Bharat Kosh (SBK) Awareness Campaign an buat­saih a, DC Sangchhin Chinzah-in a hmanpui.

Sangchhin Chinzah chuan, páwn lama inthiar a hrisel lohzia mipuiin an hriat vanga district pum páwna inthiar awm lohna, open defecation free (ODF)-ah an inpuang thei tih a sawi a, "Naupangte hnenah ODF pawimawhzia zirtir zel a nih chuan ṭhangthar la awm zel turte'n nunphungah an nei zui zel dawn a ni," a ti.

Serchhip district pumpui ODF-a puan a nih tawh avangin faina kawnga hmalak a pawimawh zual tih sawiin DC chuan, "Inzirtirna nasa zawk neih a ṭul dawn. Khaw chhung­in faina kawnga hma a sawn chak loh chhan tam ber chu kan thatchhiat vang a ni fo," a ti a; mipuite chu an khua ṭheuh vawng turin a chah.

Serchhip DC hian an ditrict chhunga RD block pahnih - Serchhip leh East Lungdar block-te hnenah leh district chhunga khaw 37 hnenah ODF certificate a hlan a ni.

Campaign-ah hian district chhunga khaw hrang hranga khawtlang hruaitute an tel a; ODF chhawm nun zel dan tur leh Swachh Kosh chungchang an inzirtir a ni.