CM-in KM H/S golden jubilee a hmanpui

Chief minister Lal Thanhawla chuan nimin khan Khawpuia Memorial High School (KM H/S) golden jubilee lawmna a hmanpui a; KM H/S aṭanga zir chhuak zinga mi chhuanawm bik te, zirtirtu hmasa leh sikul dintute hnenah chawimawina a hlan.

Lal Thanhawla chuan, kum 50 chhung KM H/S-in hlawhtling taka zirtirna a kalpui leh ram leh hnam tana mi chhuanawm tak tak a chher chhuak tawh chu ropui a tih thu a sawi a; sorkar leh kohhranah hna a tam tâwk lo tih sawiin, "Zirlai tam tak, an zirna ṭha taka zo tawhte tan hna thawh tur a tlem zel avangin, mahni kutkea ding thei zirlai chher chhuah a pawimawh hle a ni," a ti a; zirlaite thiamna ziktluak loa zirtirna pek a pawi theih avangin zirtirtute an ṭan hle a ngaih thu a sawi.

Zirtirtute chu kawh­mawh báwl loa sorkarin awm tura a tihna hmun apiangah thuawih taka an awm a ngaih thu sawiin CM Hawla chuan, "Awmna hmun apiangah zirtirtu ṭha, zirlaite hnena export quality educa­tion pe thei nih an tum tur a ni. Zirtirtute chu zirlaite tan entawn tur leh ngaihsanawm ni turin faina, hawihâwmna, tai­makna, inpekna, inchei­na, hriselna leh kawng tinrengah entawk tlak nun nei mi an nih a ngai," a ti.

Chief Minister chuan zirlaite leh ṭhalaite chu ram hmangaihna rilru pû a, ruihlo, zu leh vaihlo laka inthiarfihlim turin a ngen a; Mizo ṭhalaite'n mi dang el nachang an hriat a ṭul tawh tih sawiin, "Tun hmaa Hindi ṭawng hmuhsit leh English tawng zah tlat ang kha bânsan a hun tawh," a ti. Mizoramah hnain ṭhalaite a daih vek sen loh avangin, ram páwna hna thawk turin Hindi leh English thiam a pawimawh hmasak thu a sawi.

KM H/S golden jubi­lee lawmnaah hian an sikul aṭanga zir chhuak zinga all India service leh central civil service-a tling - Lalmalsawma (IAS), Lalram Thanga (IFS), C Lalhmachhuana (ITS) leh V Lalfala (IFS)-te hnenah chawimawina hlan a ni a; Mt. Everest-a lawn chhuak Lalrintluangi leh MPSC chairman Rev. Zosangliana Colney te hnenah special award an hlan bawk.