Coronavirus vangin ṭhulh
March 27 - 29 chhunga R Dengṭhuama Hall-a neih tura ruahman The Salvation Army India Eastern Territory General Visit cum Territorial Congress 2020 chu ruahmanna leh inbuatsaihna kalpui vek tawh chu nimah se, COVID-19 leng mek vangin ṭhulh a ni.
COVID-19 leng avang leh hemi avanga sorkarin puipunna lian buatsaih rih lo tura thuchhuah a siam chungchangah General's Visit leh Territorial Congress 2020 Organising Emergency Council chu March 10 khan Booth Mansion conference hall-ah ṭhukhawmin programme ruahman tawh sa chu ṭhulh an rel a; COVID-19 chungchangah hian March 14, 2020 zanah corps/society tinte ṭawngṭai rualna nei turin ruahmanna an siam nghal.
Tourism department-in khawvel hmun hrang hranga Zofate insuihkhawmna atana Bangladesh leh Myanmar-a Zo Kutpui buatsaih an tum chu COVID-19 vangin an ṭhulh. Ruahman lawk ang chuan Zo Kutpui hi Rangamati, Bangladesh-ah March 18-19, 2020 ah leh Tahan, Myanmar-ah April 8-11, 2020 a neih tur a ni. Khawvel hmun hrang hrangah COVID-19 a len avangin Tourism department chuan Zo Kutpui an buatsaih tum hi an ṭhulh a ni.
Isua Krista Kohhran Hmeichhe Pawl pawhin nimin aṭanga naktuk Pathianni thlenga Tanhrila 'Ram pum hmeichhe inkhawmpui vawi 46-na' an neih tur chu Coronavirus (COVID-19) laka inven nan an ṭhulh.Seventh-Day Adventist pawhin India hmarchhak huap ṭhalai inkhawmpui, 'North East India Union (NEIU) of Adventist Youth Convention-2020' March 26 - 29, 2020 inkara Seventh-Day Tlang, Aizawl a neih tura ruahman chu COVID-19 darh zel avang leh Mizoram sorkarin puipuina huaihawt lo tura kohhran hrang hrangte a ngenna zulzuiin an ṭhulh.