MSU leh MSSSB-in inremna an ziak

14th March, 2020

Mizo Students Union (MSU) Gen. Hqrs chuan, Mizoram Subordinate Service Selection Board (MSSSB) chairman atana political party mi leh sa ruat an duh loh chungchangah nimin khan MSSSB thuneitute nen an inbia a, inbiakremna an nei tih an tarlang.

MSU chuan, MSSSB chu Zoram ṭhalai hna zawng mekte tan a taka a kal vat a ṭul avangin MSSSB nen inremna an ziak tih an sawi a; MSSSB chu politics-a inchirhthehna laka a fihlim zel theih nan a en zui reng dawn thu leh, sorkar hna lâk chungchangah Mizo ṭhalaite thlavâng an hauh zel dawn thu an sawi.

MSSSB hna lak tur chungchanga induhsak bikna awm thei thil hrang hranga hlauhthawnna awm chu dah bo tur leh theihtawp chhuaha ram leh hnam tan thiamna paw chhuak turin MSU chuan Mizo ṭhalai hna zawng mekte leh zirlaite an chah a, "Thil felhlel leh lungawi lohna a awm a nih chuan MSU chu zirlaite tan a ding zel dawn a ni," an ti.

MSU leh MSSSB inremna

• MSSSB hi sorkarin a din ang ngeiin post hnawhkhah tur te, promotion case ngaihtuah tura a ruat chungchangahte dan leh hrai (rules & regulations) hi khauh taka kengkawh turin hna a thawk zel ang.

• MSSSB hnuaia post ruak hnawhkhah tur reng reng felfai takin advertisement chhuah a ni ang a, danin a phût ang takin exam a buatsaih ṭhin ang.

• Written result felfai takin a tichhuak ṭhin ang.

• Mizoram sorkarin MSSSB hnuaia hna lak hrang hrangte inkaihhruaina dan a siam (Guidelines for conduct of Examination) ṭha taka zawm a ni ang a; written mark zat leh interview mark weightage (87.5 : 12.5) chu felfai taka tarlangin, interview mark (40-80) chu dik takin a keng tlang ang.

• Hna lak chungchangah danin a phal ang zelin RTI Act hmanga pho chhuah leh en theih rengin engkim felfai takin a kalpui ang.

• MSSSB chuan ṭha tak leh felfai taka hna lak a kalpui theih nan MSU chu thawhpui a inhuam reng a. Thil fel lo leh dik lo a awm a nih chuan MSU nen a ṭul angin Mizoram ṭhalai leh zirlaite tan hma kan laho zel dawn a ni.

• Inremnaah hian MSSSB chairman Lalrammawia leh MSU president Vanlalliana Khiangte ten hming an ziak.