Ram pumah Republic Day lawm a ni

Nimin khan India ram pumah Republic Day vawi 69-na hman a ni a, Mizoramah pawh Aizawl leh district khawpui tin bakah, civil sub-division leh BDO ṭhuthmunahte hman a ni.

Mizorama Republic Day hmanna pui ber, Lammualah chuan Governor Lt. Gen. Nirbhay Sharma-a'n zing dar 9-ah hnam puanzar a pawt pharh a, parade contingent-te endikin, hnam puanzar chibai an bûk a chháng lêt.

Governor chuan, India ramin zalenna a neih theihna tura nunna hlu tak hlantu hnam pasalṭha te, mipuite duhthusam leh beiseite hre thar leh turin mi tin a chah a, "India hi khawvel ram ropuite zinga tel tura ke a pênnaah kan ram mipui rorelna kalphung leh a hlutnate vawng him a, tichak deuh deuh turin i inhlan thar ang u," a ti.

Remna leh muanna chu hmasawn­na atana pawimawh hmasa a ni tih sawiin Larsap chuan, Mizoram chu India rama state rálmuang ber a nih chhunzawm zel theihna tura dan leh thupek kengkawhtute leh khawtlang inpekna a fakawm a tih thu a sawi a; remna leh muanna, mipui zalenna ram a nih zel theih nan ṭan la zui zel turin Mizoram mipui a chah.

Governor chuan Mizoram hma­sawnna, sorkar hmalakna leh hlawhtlinna hrang hrang a tarlang a; NLUP vangin kum rei lote chhungin ei leh bar, sum leh pai din­hmunah hmuh theihin Mizoram hmel a danglam nia sawiin, "NLUP hmalakna vangin Mizoram chu UN Global Environment Facility (GEF) project-ah India rama state panga thlan zingah telh a ni," a ti.

Lt. Gen. Nirbhay Sharma chuan, ram leilung hànna chauh hmanga thlai thar chhuah, certified organic products tihlâr nan Mission Organic Value chain Development for North Eastern Region kalpui mek a nih thu sawiin, "Mission for Integrated Development of Horticulture leh NEDP hnuaiah horticulture thlai tam tham tak chîn a ni," a ti a; RKVY leh NLUP hmangin hmun tam takah sangha chi buatsaihna leh khawina dil siam belh a nih thu a sawi.

Governor sawi danin, kum 2017-18 chhungin Mizoram State Roads Project hnuaiah kawngpui thar paruk, a vaia belhkhawmin km. 77.35 sial a ni a, India rama road project lian ber, cheng vbc. 6167.58 sênna tur Aizawl-Tuipang kawngpui NH-54 siamṭhat, zauh leh tihlen hna National Highway & Infrastructure Development Corporation Ltd. hmangin thawh mek a ni.

PHE department-in in 3,293 hnenah tui connection thar an pe a, kum 2017-18 chhungin thingtlang khaw 38 tuam chhuah tum a ni. Mimal inthiarna, individual household latrine (IHHL) 19,656 sak a ni tawh a, Aizawl, Champhai, Kolasib leh Serchhip district-te chu páwn lama inthiar awm lohna, open defecation free (ODF) district-ah puan an ni tawh.

Kawlphetha chungchangah Larsap chuan, Tuirial Hydro Electric Project-in kawlpetha a siam chhuahte hralh thei tura peih ṭêp a ni tawh tih a sawi a; kawlphetha megawatt 210 siam chhuak thei tur Tuivai HEP thawhna turin North Eastern Electric Power Corporation (NEEPCO) leh sorkarin thawhhona thuthlung an ziak tawh tih a sawi bawk.

Lammuala Republic Day lawm­naah hian parade contingent 29 an tel a, commander chu DSP C Lalsawta niin, second commander chu DSP Henry Malsawmtluanga a ni. Parade contingent-te chu armed contingent paruk, unarmed contingent panga, school contingent 14 leh pipe band pali an ni.

Republic Day lawmnaah hian chief minister Lal Thanhawla, Assem­bly speaker Hiphei, minister te, MLA-te leh sorkar leh sipai hotu eng emaw zat leh zirlai ṭhahnem tak an tel.

Governor thusawi dang Thenkhatte
1) State referral Hospital-a Mizoram Institute of Medical Education & Research (MIMER) din nan post thar 629 siam remtih a ni.
2) Sorkarin Mizoram Against Drugs, Alcohol and Tobacco (MADAT) programme a kalpui a, thláwp turin mipui a sáwm.
3) Mizo hnam ziaráng leh rohlu hum­halha chhawm nun nan Mau­buangah North East Zone Cultural Centre (NEZCC) Regional Centre sakna tur ram enfel tawh a ni.
4) Maharashtra sorkar nen ṭang rualin kumina Chapchar Kût lawm laiin Aizawlah Summit leh Road Show buatsaih tum a ni.
5) North Eastern Council (NEC) aṭanga sum hmuh vbc. 10 hmangin multi-facility centre project 'Lianchhiari Rûn' sak hna kalpui ṭan mek a ni.
6) Ram ei chhetu ruihhlo nasa taka do a ngai.
7) Ṭhalai lehkhathiamte'n eizawnna an neih theih nan leh sumdawnna kawngah an thiamna leh finnate an hman ṭangkai theih nan rua­hmanna ṭha a pawimawh.