Police-in Lokhi Ranjan an man

Lunglei SP J Lalṭha­famkima chuan, New Khojoysuri khuaa Chakma foreigner nia hriat, Lokhi Ranjan chu January 25, Ningani khan police-in an man tih a puang.

Lunglei SP hian Ni­ngani khan Lungleiah thu­thar thehdarhtute kâwm­in, Lokhi Ranjan chung­changa police hma­lak dan a sawifiah. A sawi danin, Lokhi Ranjan lakah hian Tlabung MZP president Vanlallawma'n Tlabung Police Station-ah December 18, 2017 khan FIR a thehlut a, police-te'n bawhzui nghalin, Tlabung SDPO Beihmotaosa'n enquiry a la a ni.

Tlabung SDPO chuan Lunglei District Court-ah criminal complaint a thehlut a, Lunglei Chief Judicial Magistrate (CJM)-in January 23, 2018 khan complait thehluttu leh thuhretute a ko a; CJM thuràwn angin, Lokhi Ranjan-a lakah Tlabung PS-ah Foreigners Act 1946 Section 14(c) tlawhchhanin January 24-ah thubuai ziah luh a ni a, January 25-ah Lokhi Ranjan chu an man ta a ni.

Zawhna chhangin Lung­lei SP chuan, Bu­ddhist sakhua an indan­na 'Soromon' an tih hmangin Lokhi Ranjan chu a inven avangin, sakhua inzahsak chungin, January 23-a Soromon a tawp hnuah police-in an man ta niin a sawi a; pawl ṭhenkhatte nawrna vanga hma la an nih loh thu a sawi bawk.