GST hnuaiah e-waybill hman a ni dawn

Goods and Services Tax (GST) hnuaiah February 1, 2018 aṭangin India ram pumah e-waybill hman ṭan a ni dawn. e-Waybill hi GST hman hmaa chhiah lâkna dan, value added tax (VAT)-ah hman ṭhin a ni.

Taxation department aṭanga thu dawn danin, sorkar laipui ruahman anga July 1, 2017 aṭanga GST hman a nih hnuah VAT hman chhunzawm a ni lo a; chuvang chuan, state páwn lam aṭanga bungraw lâk luh chu dan ang tak tih a nih leh loh hriat a harsat bakah, GST hnuaiah dan ang taka sumdawngte tan harsatna a thlena ngaih a nih avangin, tun hnaia GST Council Meeting chuan e-waybill chu India ram pumah February 1, 2018 aṭangin hman ṭan leh a rel a ni.

Taxation assistant co­mmissio­ner Hrangthanmawia, GST nodal officer ni bawk chuan, e-waybill chu chi hniha ṭhen a nih thu sawiin, tuna an buaipui mek chu state kaltlanga indawrna, inter state w-waybill a nih thu a sawi.

Hrangthanmawia sawi danin, state páwn aṭanga bungrua Rs. 50,000 man aia tam la lutte chuan e-waybill an neih vek a ngai tawh dawn a, chu chu January 16, 2018 aṭangin a enchhinna ang deuha hman ṭan a ni. Tunah pawh sumdawng, a duh apiang tan hman theih reng a ni tawh.

Taxation Assistant Commi­ssioner chuan, state chhunga sumdawnna, intra state-ah pawh e-waybill hman dan tur ruahman mek a nih thu a sawi a; a kalpui dan tur chu sorkar laipuiin state sorkar thuneihnaah a dah angin, Mizoramah pawh hman a nih theih dan tur ruahman mek a nih thu sawiin, "A hman hun tur leh a hman dan tur chu sawi lâwk theih a la ni lo a, eng bungruaah nge chhiah lak tur tih ruahman ni tawh mah se, thutlukna fel erawh siam a la ni lo," a ti.

E-waybill hi sorkar depart­ment, sumdawng, contractor, supplier leh mimal tu pawh, state páwn aṭanga bungrua Rs. 50,000 man aia tam la lut tur tan neih vek a ngai tawh dawn a; chutih rualin, state hrang hrangah hman theih a nih dawn avangin state pakhat aia tam paltlang tur tan e-waybill pakhat bak siam a ngai lo. State páwn aṭanga bungraw lak luh Rs. 50,000 man tling lote chu a tlin lohna tilang thei tur invoice fel tak neih a ngai dawn a ni.

GST hnuaia e-waybill hman­na tur dan hi khauh taka ken­kawh a ni dawn tih Taxation department chuan an tarlang a; e-waybill chu Taxation office-ah kal kher ngai loin, online hmangin www.ewaybill.nic.in ah te, mobile application hmang leh SMS GST E-WAYBILL hmangtein tih theih a ni.