KHAWTHLIR

Thisen pe
Student Christian Movement of India (SCMI), Aizawl Theological College unit chuan nimin khan ATC dining hall-ah blood donation camp an huaihawt a, Synod Hospital tan thisen unit 28 an pe.

Governor's At Home
Governor Lt. Gen. Nirbhay Sharma chuan Republic Day pualin nimin chhun khan Raj Bhavan tualah thingpui ruai a buatsaih. Governor's At Home-ah hian sàwm bikte - CM Lal Thanhawla, Assembly speaker Hiphei, Lok Sabha MP CL Ruala, minister te, MLA te, sorkar officer te, sipai hotu te, social worker te, mi hmingṭha bikte leh chanchinbu mite an tel a ni.

Computer pe
46 Assam Rifles chuan Republic Day pualin nimin khan Muthi Branch YMA hnenah computer set leh printer an pe. Muthi Branch YMA chuan Assam Rifles chungah lawmthu an sawi a ni.

KTP conference
Kristian Ṭhalai Pawl (KṬP)-te chuan nizan khan pastor bial hrang hrangah Bial Conference an hmang ṭan. KṬP Bial Conference-ah hian vawiinah rorel inkhawm neih a ni ang a, Pathianni zanah a ṭiak ang.

Heroin man
Aizawl SP hnuaia District Special Branch chuan January 25, Ningani chawhnu khan Zemabawkah heroin hawng khat leh a neitua puh Lalzampuia (19) an man a, Bawngkawn Police Station-ah an hlan. Ruihhlo an man hi tualchhung rate-in Rs. 50,000 vel man a ni.

Kawng khâr dawn
Traffic SP C Lalthanmawia chuan thuchhuah siamin, vawiin aṭanga February 5, 2018 thlengin Laipuitlanga Dunglena in leh F Rochhunga in inkarah zing dar 9 aṭanga tlai dar 5 chhungin lirthei tlân phal a ni dawn lo a, kawng sirah lirthei dah phal a ni dawn lo bawk tih a tarlang. Lirthei tlan phal loh chhung hian SIPMIU-in tui pipeline an phum dawn a ni.