Hmun hrang hrangah Republic Day lawm a ni

Nimin khan Mizoram hmun hrang hrangah Republic Day lawm a ni a, district headquarters tinah leh civil sub-division leh block-ahte lawm a ni. District khawpuiah chuan DC-te khuallian an ni a, sub-division-ah chuan SDO-te khuallian niin, block-ah chuan BDO-te khuallian an ni. Zirna-inhmun ṭhenkhatahte hman a ni bawk.

Lunglei
Lungleiah chuan Ṭhuamluaia Mualah Republic Day hman a ni a, bawrhsap Lalzarmawii'n hnam puanzar pawt parhin parade contingent 25-te'n hnam puanzar chibai an bûk a chhang lêt.

Lalzarmawii chuan, Lunglei district mipuite chu Republic Day chibai bûkin, "Kan ram dan bu (Constitution of India) siam leh hman ṭanna ni-ah hian he danpui ropuina leh hlutna hre chhuak thar leh ṭheuh ila, mi tin kan dikna leh chanvo humhalhsaka kan awm hi kan vannei tak zet a ni," a ti. Lunglei DC hian Republic Day puala inelna hrang hranga ti ṭhate hnenah lawmman a sem.

Republic Day lawmna pual hian freedom fighter Darthawma, District Jail, Bethel Centre, KK Home, TNT Kalvari Centre, MHIP Onyx Special School, WADA Center leh Remand Home-ahte Rs. 1,500 ṭheuh hlan a ni.

Champhai
Champhaiah chuan Chhangphut Field-ah lawm a ni a, DC Vanlalngaihsaka'n hnam puanzar a pawt pharh a, parade contingent 23-te'n hnam puanzar chibai an bûk a chhang lêt.

Champhai DC chuan, an district khaw hrang hrangte chu khaw nuam, leilung rem leh sik leh sa nuam tak, pipu sûlhnu tamna hmun a nih thu sawiin, "Heng remchanna leh vanneihna zawng zawngte hi hman thiam a pawimawh," a ti. Champhai district chu la kal lo leh kal tawhte tan tlawh châkawm, Destination Champhai District-a siam thei tura ṭan la turin mipui a chah.

Siaha
Republic Day hi Siaha-ah chuan District Playground-ah hman a ni a, district bawrhsap Harleen Kaur-i'n hnam puanzar pawt pharhin, parade contingent 14-te hnam puanzar chibai bûk a chháng.

Harleen Kaur chuan, India ramin zalenna a neih hnuin mahni ngeia danpuite siam a, mipui rorelna sorkar a nih champha, Republic Day vawi-69 na hlim leh lawm taka hmang ṭheuh turin duhsakna a hlan a; India khua leh tui zawng zawngte India ram hmasawnna tur leh inpumkhatna ṭha zawkte an neih theih nan mahni inhlan thar leh turin kal khawmte a chah.

Siahaa Republic Day lawmnaah hian Dr Ambedkar National Merit Award Scheme dawngtu Lalrinchhana s/o Lalramthara (L) hnenah chawimawina thuziak leh Rs. 40,000 hlan a ni.

Lawngtlai
Lawngtlaiah chuan Vengpui khelmualah lawm a ni a, DC Dr Arun T chuan hnam puanzar pawt pharhin, parade contingent 16-te'n hnam puanzar chibai an bûk a chhang lêt.

Dr Arun T chuan, Lawngtlai district mipuite chu Republic Day chibai bûkin, an district chhunga hmasawnna hna thawh hrang hrangte a tarlang.

Serchhip
Serchhipah chuan Republic Day hi Khawtetlang Playground-ah lawm a ni a, DC Sangchhin Chinzah chuan hnam puanzar a pawt pharh a, hnam puanzar chibai buktu parade contingent-te chibai bûkna a chhang let.

Sangchhin Chinzah chuan, India mipuite duhthusam, sovereign, socialist, secular democratic republic ram ni tura India danpui duang chhuaktute zahna chibai a bûk a, "Remna leh muanna a awm theih nana beitu zawng zawngte chungah lawmthu ka sawi a. An thawhrimna zarah Mizoram leh Serchhip district ngei pawhin chak takin hma a sawn zel a ni," a ti.

Republic Day pual hian zing­ah District Hospital Poor Fund, Unity Orphanage Home, Shalom Special School, Zoar Deprived Children Home, Old Age Home, Adult Rehabilitation Centre leh District Jail-ahte thilpek hlan a ni.

Kolasib
Kolasib-ah chuan Ṭumpui khelmualah hman a ni a, district bawrhsap R Zarzosanga'n hnam puanzar pawt pharhin, hnam puanzar chibai bûktu parade contingent 15-te chibai bûk a chháng.

R Zarzosanga chuan, Republic Day chu ram tana nunna hlantute leh ramin hma a sawn zel theih nana thiamna leh finna hlantu te hriatreng nan hmang ila a duh thu sawiin, "Republic Day-ah hian India danpui duanna kawnga a khaipa ber Dr BR Ambedkar (Father of Indian Constitution)-in India ram chu rualkhai taka hma a sawn theihnana a hmalaknate pawh hriat reng a ṭha awm e," a ti.

Mamit
Republic Day hi Mamitah chuan chuan GSA Playground-ah lawm a ni a, DC Lalbiaksangi'n hnam puanzar pawt pharhin, parade contingent 15-te hnam puanzar chibai bûk a chháng lêt.

Mamit DC chuan, mipui­te chibai bûkin, "India ramin zalenna a neih theihna tura nunna hlu tak hlantu hnam pasalṭha te, mi tinte intluktlanna, zalenna, inunauna leh inpumkhatna ram ni tura India-in mahnia inrêlbâwlna a neih theihna tura ram danpui duang chhuaktu ram hruai­tu hmasate kha kan hre reng a, kan rilruin zahna chibai kan bûk nawn leh a ni," a ti.