Mizo history-ah zalenna sualtute thil tih a nung reng tawh ang - Home Minister

Chawngbawla Battalion 54th, Ex-Mizo National Army chuan nimin khan an dincham Chhinga Veng YMA Hall-ah an lawm a, khuallian home minister Lalchamliana chuan zalenna sualtute thil tih chu Mizo history-ah a nun reng tawh tur thu a sawi.

Lalchamliana chuan kum 20 zet ramhnuaia an awm hnuah inremna an neih thu sawiin, "Kan thiltih tawhte kha thai reh theih a ni lo a, Mizo history-ah a nung reng ang. Nunna hial chan huama ram leh hnam tana thawktute kan ni a, tunah hian zalenna sualin buai tawh rih lo mah ila, zalenna sualtute kha chuan kan nun uluk a ngai. Kan awmna hmun ṭheuhah khawtlang leh kohhrana kan inhman tam a pawimawh," a ti.

Home Minister chuan zalenna sual tawh nih chu chapopui nana hmang loin, chhuan tur a nih thu a sawi a, "Keini hi kan inchawimawia kan inhmangaih loh chuan tumahin min ngaihlu dawn lo. Chhiatni leh ṭhatniahte inngai pawimawh tawnin, lungrual ang u. Kan pun belh dawn loa, kan kiam zel dawn a ni," a ti a, zalenna sualtute chu inpumkhat zel tur an nih thu a sawi.

Report petu sergeant Rodinga sawi danin, Chawngbawla Battalion Mizo National Army hi a lam tawiin 'CH' BN-MNA tih a ni. Mizo National Front underground-ah armed (silai) huma hmelma bei thei tur 'ral hma tawng tur' insiamfel nise a tih avangin Mizo National Army chu battalion 7-ah ṭhenfel a ni a, chung zinga Battalion pakhat chu 'CH' BN.MNA tih a ni a, March 13, 1967 khan dinfel a ni.