Sihphir YMA-in Zangnadawmna pek phût

Sihphir Branch YMA chuan, an member Lal­biakzuala s/o HV Lalnuntluanga, January 22, 2018 zana Chief Minister escort party-in Serkhan khuaa kut an thlaka vanga damdawi-ina enkawl mek chu a inenkawlna senso zawng zawng tumsak tur leh, zángnadawmna pe turin Mizoram sorkar an phût.

Sihphir Branch YMA chuan, Kolasib aṭanga haw Chief Minister escort party police-te'n 207 pick-up hmanga thingzai tlâwn 50 phurtu Lalbiakzuala chu Serkhan khaw chhung, Nisapui/Bagha road pêng aṭanga Aizawl lam kawng chho ulh laiah ûm phain, km. chanve (metre 500) vel kawng a ken lawk loh vanga sawisa a, thi chhâwng a an kalsan chu pawi an tih thu leh an dem thu an tarlang a ni.

Lalbiakzuala chu mahnia che ṭha hlei thei lo leh zung thei loin Synod Hospital-ah enkawl mek a ni tih sawiin Sihphir YMA chuan, "Police-te kutthlak vanga chhungkaw pa ber leh eizawngtu ber damdawi-ina a awm mek laia January 24, 2018-a MPCC Media department-in press conference-a press mite zawhna an chhannaah, CM escort party-te'n Lalbiakzuala kut an thlak miah lo anga an sawi hi pawi kan tiin, hetiang thu dik tâwk lo hmanga insawifiah leh mipui rilru hruai kawih an tum hi kan ngai thutak hle," an ti a; tun hnuah thu dik lo thehdarh tawh lo turin an ngen.

Sihphir Branch YMA hian January 30, Nilaini ral hma ngeiin Lalbiakzuala kutthlaktute chu man a, an phu tâwk hremna pe ngei tur leh, a inenkawlna senso bakah, zangnadawmna pe ngei turin Mizoram sorkar an phût a; "Police-te leh ram hruaitute pawh hma la turin kan phût a. Kan member-pui Lalbiakzuala hi a tawp thlengin a dikna chanvo a hmuh ngei theih nan thlàwp tlat kan tum thu mipui hriatah kan puang e," an ti.

Hemi rual hian Sihphir YMA chuan, Lalbiakzuala’n kawng a têt leh ṭhat tâwk loh vang­a Chief Minister escort party kawng a kian lawk lo chu pawi an tih tak zet thu sawiin, "Ngaihdam leh hriatthiam a ṭulna apiangah kan member a nih angin Sihphir Branch YMA chuan ngaihdam leh hriatthiamna kan ngen e," an ti bawk.