KHAWTHLIR

Nimin khan Serchhip district magistrate H Dolianbuaia'n CO­VID-19 chungchangah thla hnih chhunga hman turin thuchhuah a siam. Magistrate thuchhuah chuan Serchhip district chhunga international/inter-state border inkalpawhna gate/check posts zawng zawngte khar nghal vek tur a ni thu leh ramri kan khap a nih thu a tarlang. 

Chakma Autonomous District Council (CADC) hnuaia village council (VC) inthlanpui chu nimin khan tluang taka neih a ni a, VC 88 awm zinga 82-ah inthlan hi buatsaih a ni a, VC parukah chuhtu awm loin candidate awm chhunte tlinga puan an ni. Nimin vek khan Lai Autonomous District Council hnuaia Council Veng VC seat khat atan bye-election neih a ni bawk.

Pachhunga University College (PUC)-a Department of Management leh Department of Commerce chuan, nimin khan PUC seminar hall-ah 'Cleanliness and Anti Plastic Campaign Programme' an buatsaih a, AMC councillor Rosiamngheta'n a hmanpui. Seminar hi Department of Manage­ment faculty Dr Vanlalmalsawma'n a kaihruai a ni.

SCERT, Directorate of School Education leh Samagra Shiksha hmalaknain tun hnai khan NISHTHA hnuaiah Mizoram pumah elementary school zirtirtu 6938 train an ni. Training hi district pathum - Aizawl, Kolasib leh Mamitah te neih a ni. 

MHIP Sub. Hqrs., Mamit chuan nimin khan Mamit Bazar Veng hall-ah khawmpui an hmang a, khuallian bialtu MLA H Lalzirliana chuan Mizo hmeichhiate chu hmeichhia an nihna chu insit phah nana hmang lo turin a chah. Mamit CJM Gracy L Bawitlung pawhin 'Tu leh fate ruihhlo laka venhim leh chhanchhuak tura ṭanlak' tih thupui hmangin thu a sawi.