Central sorkarin miretheite hamṭhatna tura a duan Mizoram sorkarin party hamṭhatna atan hmang ṭhin - Mizoram BJP President

Mizoram BJP president Vanlalhmuaka chuan central sorkarin miretheite hamṭhatna tura a duante chu Mizoram sorkarin anmahni ta emaw tiin, party hamṭhatna tur atan an hman ṭhin thu a sawi.

Vanlalhmuaka hian nimin khan Champhai District BJP pisaah thu sawiin, BJP chu miretheite tan a belh tlak party a nih thu a sawi a, "Mirethei hi Mizoram ah pawh a tam zawk kan ni a, India ramah pawh chuti tho anih avangin BJP chuan miretheite hamṭhatna tur tam tak a duang a ni. Mizorama mirethei tam tak pawhin kan chhawr mek a, chutihlaiin state sorkar chuan anmahni tih chhuah ang leh mahni ta emaw tiin, party hamṭhatna tur atan an lo hmang ṭhin niin thu te kan dawng a, a zia lo hle a ni," a ti.

Mirethei damlo enkawlna atan sorkar laipuiin cheng nuai 3 a dah thu sawiin Mizoram BJP President chuan, "Mizoram sorkarin SEDP atan nuai 2 kan dah tiin mipui a bum mek niin a lang. Tunah phei chuan nuai 5 bill theihna tur central sorkarin a ruahman leh tawh. SEDP hi an intiam anga an sorkar aṭanga nuai thum sem an tih chu an tihtheih lohzia kan hmu leh tawh a ni," a ti a, BJP hi Mizorama a sorkar hunah chuan MNF leh Congress sorkarten an tih ngam loh party mite duhsak uchuakna tel lo in, mitin tan an thawh tur thu a sawi.

Vanlalhmuaka chuan Prime Minister Housing Scheme kalpui mek pawh a dik leh dik loh endik turin theihtawp an chhuah dawn tih sawiin, "Chenna in nei loten kum 2023 ah chuan an nei vek tur a ni a, dan ang taka chang tur ngei ten anchan theihna turin theihtawp kan chhuah dawn. Thlamuang takin lo awm rawh u. In nei lote in pek anih laia Mizoramah in ṭha tak tak nei ten an dawng ta mai han hmuh te hi a lungchhiatthlak a ni," a ti.