National Hydrology Project thlirho

Irrigation & Water Resources (IWR) minister C Lalrinsanga hoin nimin khan IWR CE committee room-ah National Hydrology Project leh Japan International Cooperation Agency (JICA) kaltlanga Mizoram tana hmalakna hrang hrang thlirho a ni.

C Lalrinsanga chuan an hmalakna leh hmachhawpte chu Mizoram tana pawimawh tak a nih avangin tha thlah lo turin officer te a chah a, "Thiamna sang zawk hmanga hmanraw changkang leh tunlai ber berte nen hmalak a ni tur hi a phurawm hle. Mizoram tui din­hmun diktak hriat theih a nih hunah in hnathawh ṭangkai zia kan hre deuh deuh dawn a ni. Loneitute harsatna sutkian a nih bakah luidung nungchate, thlai leh ramngawte, lui humhalh kawngahte, tuilian laka inven nante pawh ṭangkai tur a ni," a ti.

Meeting-a tarlan a nih danin, central sorkar chuan ram hmasawnna tura ruahmannate tihlawhtling tur chuan kan Water Resources Information hriatchian chu thil pawimawh berte zing a mi  ani tih hriain National Hydrology Project (NHP) hi MoWR (tuna Jal Sakti) chuan a duangchhuak a ni. National Hydrology Project atan hian Ministry of Jal Shakti-in World Bank pawisa leh ministry pawisa hmangin implementing agency hnenah 100% central funding-in a pe a ni. Kum 8 chhunga (2016-17 to 2023-24) zawh tura ruahman a ni.

National Hydrology Project-in a tum ber chu ram hruaituten ram hmasawnna an rel chi hrang hrangte tihlawhtling tur leh chak leh dik zawka thutlukna an siamtheih nan ram pum lui tui neihzat te (river discharges, rainfall), sik leh sa chet vel dante tunlai thiamna sang ber hriatna leh hmanruate hmanga rualkhai taka hriat nghal zung zungna tur chhawpchhuah leh hetiang lam khawihtu agency-te tih changtlun a ni.