Thal thlah hmasa nih ṭha kan ti lo. A ṭul erawh chuan kan inkâp ang - Home Minister
Home minister Lalchamliana chuan, Mizoram leh Assam ramri buai chungchangah Mizoram sorkar chuan thal thlah hmasa zawk nih ṭha a tih loh thu a sawi a, "A ṭul a nih erawh chuan kan inkâp ang," a ti.
Home Minister hian nimin khan a pisaah thuthar thehdarhtute a kâwm a; Mizoram leh Assam-in ramri km. 160 chuang an neih thu sawiin, "Mizoram leh Assam ramri buaina hian kum tam tak a awh tawh a, district council leh UT hun lai aṭang tawhin vawiin thleng hian buaina neuh neuh kan nei reng ṭhin," a ti a; ramri buai chu chinfel a la nih loh thu a sawi.
Tun hnaia Mizoram leh Assam inrìnaah Assam-in hma thar laa buaina leh harsatna an siam thar leh chu ṭha an tih loh thu sawiin Lalchamliana chuan, "Kan dem tak zet a ni. Kar hmasa lamah khan Pu Chalchhunga, Buarchep khaw huana thlaite tichhiain hma an rawn la a, mihring eizawnna intihchhiatsak hi a vanduaithlakin a inzah loh thlak kan ti hle. A àwm tâwk compensation pe turin Assam sorkar hi kan phût a, hei hi a hlawhtlin theih nan Mizoram sorkarin theihtawp chhuahin a bawhzui ang," a ti.
Home Minister chuan, ramri veng hima mipui thlamuan turin police-te a hmunah ṭhahnem tak an awm mek tih sawiin, "A awm sate a ṭul anga tichak tur leh pui turin tunah hian kan theih anga tam thawn belh a ni a, a ṭul dan azirin a dangte pawh inrálring tura tih an ni. Tunah hian ramria kan police duty mekte mamawh ang ang pek mek zel a ni," a ti a; sorkarin police-te mamawh a ngaihtuah zel tur thu a sawi.
Ramri buai chungchanga Mizoram sorkarin hma a laknaah mimal emaw, páwl ang emaw, hmingṭhat lak tum emaw, inchirhtheh nan emawa hman tur chi a ni lo nia sawiin Lalchamliana chuan, "Hnam anga kan ṭanrualna tur chi a ni. Ramri buai avanga eng eng emaw harsatna a awm a nih pawhin, tuarchhel taka awm turin mipui ka chah duh a ni," a ti.
Vanglaini palai zawhna chhangin Home Minister chuan, Aitlang leh Buarchep hmuna Assam lamin Mizote huan an chhuhsak chu a theih chin chinah neih lêt an tum tur thu a sawi a, "Tun dinhmunah chuan inkah hi kan tlin loin kan hri a, a ṭul a nih erawh chuan kan inkâp ang," tiin, loh theih loh thil a nih loh chuan inkah loh ṭha an tih thu a sawi.
Ramri buai chungchangah dan anga hmalak tum a nih leh nih loh zawhna chhangin Lalchamliana chuan, "July 14 hian Chief Minister hoin all party, NGO leh MKHC aiawhte kan ṭhukhawm dawn a, chutah chuan hmalak zel dan tur ngaihtuah a ni ang. 1875 ramri hi Cabinet chauhin kan ram chin atana a pawm a ni lo a, Assembly House-ah eptu lam pawhin an pawm vek a ni," a ti.
Home Minister hian ramri dep khaw mipuite inpekna leh huaisenna fakawm a tih thu pawh a sawi a ni.
Home Minister ṭawiawmtu Serlui bialtu MLA Lalrinsanga Ralte chuan, kum 2019-ah Assam Forest-te'n cinema hall hlui an chei avangin Mizoram sorkarin BRTF hmun hluiah police an dah ve nghal thu a sawi a, "Kum 2020-ah Thinghlun leh Saihapui-V lamah Assam-in buaina an siam leh a, police eng emaw zat tirh nghal a ni," a ti a; Vairengte lamah chuan MNF sorkar hnuah km. 1 chuangin ram zauh a ni tawh niin a sawi.
Lalrinsanga Ralte chuan, ramrî-ah hmasawnna hna thawh zel a nih thu sawiin, "Buarchep lamah pawh kawng laih a ni a, Assam lamin hnawk an tih avangin an rawn lài ve chauh zawk a ni," a ti.
Home Minister hi minister pahnih - Lalchhandama Ralte leh Lalruatkima bakah, Home secretary Lalbiaksangi leh IGP John Neihlaia ten an ṭawiawm a ni.