Durtlang BSUP CCC tihruah a ni dawn

Health minister Dr R Lalthangliana kaihhruaiin nimin khan Secretariat conference hall-ah Covid-19 kaihhnawih thil hrang hrang rêl a ni a; Durtlang BSUP CCC chu a chhak lamah lei tawlh thei a la awma ngaih a nih avangin fûr laiin tihruah a ni dawn.

Ṭhutkhawmah hian, zirchianna aṭangin Dur­tlang BSUP CCC chhak lamah lei tawlh thei a la awm thu sawi a ni a, fûr lai chuan luah loh a ṭha zawka hriat niin, tihruah tura ruahman a ni.

Durtlang BSUP hi vawiinah Aizawl Mayor kaihhruaiin UDPA, DMR, GMR, Aizawl DC, PHED, PWD, PE leh Health department hotute'n an tlawh dawn a; CCC atana hman theih tur hmun hual lâwkte an thlithlai nghal bawk ang.

Hripui vei an pun zel avangin dedicated covid hospital (DCH) - SRH-ZMC chu a khat hneh hle tih tarlan a ni a; khum 237 awmnaah Covid ward pasarih leh khum 34 awmna ICU a awm mek. July 1-12 inkar chhungin chawhrualin ward-ah ni tin damlo mi 262 an awm a, nimin khan damlo 302 an awm. ICU-ah chawhrualin ni tin mi 36 enkawl ang a ni a, nimin khan damlo 37 enkawl mek a ni.

ZMC tih thàwlna tura DCHC atana ruahman MRB Head Office, khum 50 awmna chu hman tawh niin, damlo an khat reng a, na vak lote chu CCC leh CCCC-ahte sawn chhuah ṭhin an ni. Kulikawn Hospital chu DCHC atan ruahman tum a ni a, damlo awm mekte chu Civil Hospital, Aizawlah sawn tum a ni.

SRH-ZMC-ah hlawh nei loa thawk tura inpe (volunteer) MCON-a B.Sc. (Nursing) final year leh Health & Wellness officer mi 40 vel chu an exam a hnaih tawh avangin an chawlh a ngai a; khum 30 awmna Covid ward siam thar chu hman tura peih ni tawh mah se, thawktu mamawh belh a nih thu an tarlang.

AMC hotute chuan, AMC huam chhunga CQF 124, CCC & paid CCC 11, CCCC 44 leh hotel quarantine facility 18-te hnawmhnawk leh bawlhhlawh an paihsak a; chuta tan chuan mimal bawlhhlawh phur lirthei LMV pali leh MMV pahnih leh thawktu mi pariat an rawih belh thu an sawi.