Buarchepah buaina thar a awm lo : Assam-in hna an thawh chhunzawm

Phainuam khaw ram Buarchepa Chalchhunga huana July 10, 2021-a Assam lamin kawng an sial avang leh Mizo thlai eng emaw zat an tihchhiat avanga buaina a chhuah hnuah, nimin lamah chuan buaina a awm lo. Hetih lai hian, Assam lam chuan Chalchhunga huanah kawng sial hna an thawk zui zel.

Phainuam aṭanga Vanglaini thu dawn danin, Assam lam chuan nimin khan Chalchhunga huan leh a chhehvelah kawng laih hna an thawk chhunzawm a; mahse, Mizoram police-in kal an phal lohna chin lui erawh pelh an tum lo. Luite bulah hian Mizoram police an inkulh a, lui pêla Assam lamin hmalak an tum a nih chuan lo dang tura tih an ni.

Lui bul velah Assam leh Mizo­ram police-te an awm ve ve a, inkalpawh an tum lo. Assam lamin luitêah lei dawh a, kawng sial chhunzawm an tum a nih rin a ni a; Mizoram lam pawhin Mizoram police-te awmna chin lamah kawng an siam ve mek bawk.