Mizoram sorkar a tawlh dawn lo - Rajya Sabha MP

Rajya Sabha MP K Vanlalvena chuan nimin khan Phainuam ram, Buarchep hmuna Mizoram police inkulhna hmun a tlawh a, buaina thlengah Mizoram sorkar a tawlh ngai loh tur thu a sawi.

K Vanlalvena chuan, Assam hoin Mizoram an tihbuai ngam leh tawh lohna turin an inbuatsaih nia sawiin, "Tuna inkah rup rup lam ka sawi lo. Hei hi mi va cho leh vauna erawh a ni lo. Tuna an inkulhnaah hian awmtir reng kan tum lo. Ram leh hnam chhan tur hian tam leh tlem lam a ni lo a, Mizo pahnih hian a tàwpkhâwkah chuan vai 40 kan ngam. Tun thlengin hnam huaisen kan nihna a la bo lo," a ti.

Chief Minister hoin July 11, Pathianni khan an ṭhutkhawm thu sawiin MP chuan, "Aitlang a ni emaw, Buarchep a ni emaw, heng lai vela inkalpawhna kawng siam ṭhat ngai awmte chu ngaih pawimawh hmasak tur a nih thu rêl a ni," a ti a; tuna mamawh hmasa police camp-te pawh silpauline chauh ni lo, rângva leh hmanraw ṭha zawka cheibàwl thuai tum a nih thu a sawi.

K Vanlalvena chuan, thlám inhâlsak leh huan intihchhiatsakte Mizote'n an ti ve ngai lo tih sawiin, "Assam ho awm mai mai hi an thil kan tihchhiatsak ve lo. Pathian leh mihring mit hmuhah te, khawvel mit hmuhah pawh thiam kan chang a ni. Niminah pawh Chief Minister hoin kan pass a, he lai buainaah hian sorkar a tawlh ngai lo ang," a ti.

Rajya Sabha MP chuan, police leh khawtlang hruaitute fakin, duty-te'n mobile phone signal chhiat thu te, kawng leh electric lama an harsatna an sawite chu theihtawp chhuaha a bawhzui tur thu a sawi. MP hian police duty-te hnenah silpauline eng emaw zat a pe a ni.