ZMC-ah cheng nuai 27 man bungrua pe

D-3 Business Enterprise chuan Zoram Medical College (ZMC)-a hman turin ICU bungrua cheng nuai 27 man an pe a, a neitu Dr Lalmalsawma Nghaka chuan nimin khan ZMC Director hnenah a hlàn.

ZMC hnena bungrua pekte chu Dr Lalmalsawma'n LG company hnena CSR fund a dil chhuah hmanga lei a ni a; ton 2 air conditioner 22, ton 1 air conditioner pali, hrawk enna video laryngoscope pahnih leh rîkrum thila hman tur crash cart pali a ni.

Hlanna inkhawm tâwiah Dr Lalmalsawma chuan, "Covid-19 dona atan LG company lamah pawisa a awm tih ka hria a, Health Minister ka beráwn a, ZMC Director pawh vawi tam ka be buai bawk. LG hotu Korean mite pawh min pek ngei a ngai tiin ka nawr nasa ve hle a, tunah a hlawhtling ta hi a lawmawm hle a ni," a ti.

ZMC director Dr John Zohmingthanga chuan, Covid-19 léng thawh thumna thleng theiah an inhmakhua lâwk nasa tih sawiin, "Naupang tan khum 40 awmna ICU siam kan tum a, HDU semi ICU khum 10, nausên deuh bik tan NICU khum 25 leh naupang tan Paediatric ICU khum 10 siam tumin hma kan la mek a ni," a ti a; chu'ng atan chuan DoNER hnuaia NESIDS aṭangin pawisa hmuh beisei a nih thu leh cheng nuai 150 vel senna tur oxygen pipeline siamna atan TATA Trust sum an dil thu a sawi.