July 12-ah Covid-19 positive mi pali an thi

Mizoramah nimin khan tlai dar 5 thlengin Covid-19 vei mi pali an thi a; sorkar chhinchhiah angin, hripui vanga Mizoram thi chu mi 112 an tling tawh.

Lalchhuanthangi (88), w/o J Lalpuithanga (L), Laipuitlang, Aizawl chu Covid-19 vangin nimin zing dar 2:40 khan SRH-ZMC-ah a thi a, nimin khan vui a ni. Covid-19 positive a ni tih July 7, 2021-ah hmuh chhuah a ni a, July 8 aṭangin SRH-ah enkawl a ni. A chhungte chuan, upa chak lo lam tawh a ni tih loh chu natna dang a nei lem lo tih an sawi.

Covid-19 vei SRH-a enkawl lai Lalropuia Pachuau (64) h/o Lalthan­mawii, Falkland Veng, Aizawl chu nimin zing dar 4:30 khan a thi a, nimin khan Falkland Veng Presbyterian Kohhran biak-inah vui a ni. Amah hi natna dang nei sa a ni lo a; Covid-19 positive a ni tih June 25, 2021-ah hmuh chhuah niin, June 28-ah SRH-ZMC-ah dah luh a ni.

Thanseii (84) m/o Vanlalhruaii, Ramhlun Vengthar chu nimin chawhnu dar 1:30 khan hripui vangin SRH-ZMC-ah a thi a, nimin vek khan vui a ni. Covid-19 positive a ni tih kumin June 4 khan hmuh chhuah niin, June 11 aṭangin SRH-ah enkawl a ni a; natna dang nei sa a ni lo.

Ramhlun Vengthar YMA hruaitute hnen aṭanga thu dawn danin, Thanseii hi a hmain Covid-19 positive a ni tih hmuh chhuah tawh niin, Durtlang BSUP CCC-ah enkawl a ni a, hripui laka a fihlim hnuah chhuahtir a ni a, chhuahtir a nih hnu deuhah hripui a vei tih hmuh chhuah leh a ni.

July 11, Pathiannia TrueNAT hmanga hripui vei hmuh chhuah Vansangpuii (39) w/o C Lalhmangaihzauva, Lawngtlai New Vengpui chu nimin chhun dar 11 khan a thi.

Rauthla editor Elvis Lalthangzuala hnen aṭanga thu dawn danin, Vansangpuii hian nau a pâi mek a, Covid-19 positive a ni tih hmuh chhuah a nih hnuah nimin khan Lawngtlai District Hospital-ah nau hrintir tum a ni. Mahse, SRH-ZMC lama hruai (refer) a ni ta zawk a, ZMC panpui a nih laiin Haulawng dáiah a thi a ni. Sorkarin nimin zinga Covid-19 positive result a tihchhuahah symptom nei lo a nih thu a tarlang.