NHM-a thawkte'n nawrh an ṭhulh

National Health Mission (NHM) hnuaia thawk intél khawm, NHM Employees Union, Mizoram (NEUM) chuan Mizoram sorkara thil phût an neih avanga lungawi lohna lantirna atana vawiin aṭanga a huhoa chawlh lak an tum chu an ṭhulh.

NEUM hian sorkara an thil phût hrang hrang tihhlawhtlin phûtin vawiin aṭanga ni thum chhung, tun kar Ningani thleng mass casual leave lak an tum a; mahse, nimina chief secretary Lalnunmawia Chuaungo nen thil an sawiho hnuah lungawi loh lantir chu an ṭhulh rih tih an puang a, "Kan beisei anga thil a kal lo a nih chuan a ṭul angin hma kan la chhunzawm leh ang," an ti.

NEUM tarlan danin, nimina Health Minister duh dan anga Chief Secretary hoa inbiaknaah hian Health Secretary, DPAR Secretary, Finance Secretary leh NHM Mission Director-te pawh an tel a ni. Inbiaknaah hian Chief Secretary chuan, NHM hnuaia thawkte harsatna sutkian a nih theih nan study group siam tura tih a nih thu a sawi a; study group-ah chuan Health Secretary, DPAR Secretary, Finance Secretary leh NHM Mission Director-te an tel. Study Group hian July 14, 2021aṭangin hma an la ṭan ang.

NHM hnuaia thawkte mumal taka hlawh pek a nih theih nan advance allocation neih dan tur ngaihtuahpui turin Chief Secretary chuan Finance Secretary a hriattir nghal bawk. NEUM thuchhuah chuan, "Chief Secretary hoa kan meeting-ah hian kan harsatna leh kan duh angte hma min lakpui nghal dawn avangin Chief Secretary leh officer dangte chungah lawmthu kan sawi. Min ngen angin ni thum chhung mass casual leave kan lak tum chu tun dinhmunah chuan kan ṭhulh ta rih a ni," a ti.