KHAWTHLIR

Nuai 200 thawh
Mizoram sorkar hnathawk pawl hrang hrang intèl khawmna, Federation of Mizoram Government Employees & Workers chuan ni khat hlawh an thawh khawm Rs. 2,00,00,000 chu nimin khan Chief Minister's Relief Fund for Covid-19 ah an chhûng lut. FMGEW hian June 17, 2021 khan Rs. 3,00,00,000 an lo thawh tawh a, Covid-19 do nana kumin bika CMRF-a an thawh tawh zat chu Rs. 5,00,00,000 a ni.

ZMC-ah pe
CodNerc chuan July 11, 2021 Pathianni khan Zoram Medical College-a thawkte tan biscuit báwmpui 63 an pe. Biscuit-te chu Covid-19 donaa ṭangkai thei tur bika ITC company siam a ni. World Vision India pawhin nimin khan Aizawl DC hnenah Aizawl, Lunglei leh Serchhip district tan Covid-19 laka invenna hmanraw chi hrang hrang an hlân bawk.

Darthlalang hlân
Lunglei High Powered Committee (HPC) vice chairman Lawmawma Tochhawng, MLA chuan nimin khan Lunglei khawpui chhunga VC pakua hnenah traffic convex mirror 19 a hlân. Darthlalang hi Lungleia lirthei khalhtute leh mipuite him zawk theihna tura Lunglei HPC leh Lunglei DTO hmalaknain lei a ni a, khawpui chhunga traffic tamna, chetsualna thlen tawhna leh chetsual palh hlauhawmna hmun 15-ah dah a ni ang.

Hun pawtsei
Disaster Management & Rehabilitation department chuan nimin khan thuchhuah siamin, kumin April thlaa district hrang hranga kângmei chhuak chungchang zir chiang tura din, State Special Investigation Team-in report an thehluh hun tur chu ni 15 chhung atan pawhsei a nih thu a tarlang.

Thilpek hlân
Joseph Construction, Aizawl chuan nimin khan Dapchhuah khua containment zone-a puan a nih avangin an khawtlang chhawmdawlna atan buhfai ip 20, dailuah leh alu ip sarih ve ve, purûn sen ip thum, tél báwmpui panga an pe.