Zirtirtute sikul an kal ṭan

Hun eng emaw chen hnuah School Edu­cation department-in rua­hmanna a siam angin nimin khan zirtirtute sikul an kal ṭan a, zirlaite erawh an la kal lo.

School Education de­part­ment chuan July 9, 2021 khan order ti­chhuakin, ṭha zawka online/offline hmanga zirna kalpui a nih theih nan July 12, 2021 aṭangin zirtirtute sikul kal turin a hriattir a ni.

Vanglaini palai zawh­na chhangin Edu­cation minister Lalchhandama Ralte chuan, zirtirtute hmun khata awm a, headmaster-te kaihhruaina hnuaia online class kalpui chu hmun hran hran aṭanga tih ai chuan zirlaite'n an hlâwkpui ngei a beisei thu a sawi.

School Education Minister chuan, hmun ṭhenkhatah chuan zirtirtute sikul an la kal ṭan thei lo tih sawiin, "Khaw ṭhenkhat chuan hripui vangin Aizawl aṭanga zirtirtute an lêt an duh lo a, ṭhenkhat erawhin an in quarantine dawn chuan an phal thung," a ti.

Sikul ṭhenkhat, qua­ran­tine centre atana hmanah chuan sikulah zirtirtute an la kal dawn lo a, DEO/SDEO leh headmaster-te'n ruahmanna siamin, zirtirtute an kal khawm theihna hmun tur an ngaihtuah ang.

Primary school zirtirtute chu chawlhkar khatah ni hnih tal sikula kal tura tih an ni a; middle school, high school leh higher secondary school-te chu ni thum tal kal tura tih an ni.